गोदामाच्या मागे लवकरच ‘खाऊ गल्ली’ आणि उद्यानात सेल्फी पॉईंट साकारणार
सावंतवाडी,दि.१२: शहरातील महिला व युवकांना रोजगाराच्या संधी उपलब्ध करून देण्यासाठी आणि पर्यटनाला चालना देण्यासाठी सावंतवाडी नगरपालिकेच्या वतीने महत्त्वाकांक्षी पावले उचलली जात आहेत. पालिकेच्या गोदामामागे जेथे आठवडा बाजार भरतो, त्या रिकाम्या जागेत लवकरच ‘खाऊ गल्ली’ उभारण्यात येणार असल्याची माहिती पालिकेच्या उद्यान व पर्यटन सभापती मोहिनी मडगावकर यांनी दिली. मडगावकर यांनी नुकताच आपल्या पदाचा कार्यभार स्वीकारला असून, त्यानंतर त्यांनी तत्काळ जनरल जगन्नाथराव भोसले उद्यानाची आणि नियोजित खाऊ गल्लीच्या जागेची पाहणी केली.
यावेळी त्यांनी उद्यानातील सद्यस्थितीचा आढावा घेतला. उद्यानातील जुनी खेळणी सध्या धोकादायक स्थितीत असून ती तातडीने बदलण्यासाठी पाठपुरावा केला जाणार आहे. तसेच उद्यानाशेजारी असलेला धोकादायक नाला स्लॅब टाकून बंदिस्त करण्याचे नियोजन असून, एमटीडीसीच्या माध्यमातून पूर्वीची खेळणी पुन्हा सुरू करण्याबाबत प्रशासनाशी चर्चा केली जाणार असल्याचे त्यांनी सांगितले. सावंतवाडी शहराच्या समृद्ध संस्कृतीला साजेसा एक आकर्षक ‘सेल्फी पॉईंट’ उभारून शहराच्या सौंदर्यात भर घालण्याचा मानसही त्यांनी बोलून दाखवला.
शहराच्या आर्थिक स्थितीवर भाष्य करताना मोहिनी मडगावकर म्हणाल्या की, महामार्ग आणि रेल्वे शहराच्या बाहेरून गेल्यामुळे पर्यटक थेट शहरात येण्याचे प्रमाण कमी झाले आहे. ही शहराच्या उद्योगधंद्यांसाठी आणि हॉटेल व्यवसायासाठी धोक्याची घंटा असून, त्यावर सकारात्मक तोडगा काढणे आवश्यक आहे. या पार्श्वभूमीवर खाऊ गल्लीचा प्रकल्प अत्यंत महत्त्वाचा ठरणार आहे. आठवडा बाजार मंगळवारी भरतो, मात्र इतर वेळी ही जागा रिकामी असते. या जागेचा योग्य वापर करून स्थानिकांना रोजगार दिला जाईल. यामुळे कोणाचेही नुकसान होणार नाही, उलट शहरात नवीन रोजगाराचे दालन उभे राहील.
हे सर्व प्रकल्प राबवताना राज्याचे पालकमंत्री नितेश राणे, सार्वजनिक बांधकाम मंत्री रवींद्र चव्हाण आणि नगराध्यक्षा श्रद्धा भोसले यांच्यासह सर्व वरिष्ठ नेत्यांना विश्वासात घेऊन सकारात्मक निर्णय घेतला जाईल, असेही त्यांनी यावेळी स्पष्ट केले. यावेळी त्यांनी उद्यानातील कर्मचाऱ्यांशी संवाद साधून त्यांच्या समस्याही जाणून घेतल्या.
