धर्मादाय आयुक्तांच्या निर्णयानंतर संस्थेची मान्यता रद्द; खेळाडू, पंच आणि पालकांनी आमिषाला बळी पडू नये, अध्यक्ष प्रसाद अरविंदेकर यांची प्रसिद्धीपत्रकाद्वारे माहिती
सिंधुदुर्ग,दि.२३: सिंधुदुर्ग जिल्ह्यातील कबड्डी क्षेत्रात सध्या मोठी खळबळ उडाली आहे. येत्या २६ जुलै २०२६ रोजी आयोजित करण्यात आलेल्या एका तथाकथित ‘जिल्हास्तरीय कबड्डी पंच शिबिरा’बाबत सोशल मीडियावर जोरदार चर्चा सुरू आहे. मात्र, या शिबिरापासून जिल्ह्यातील कबड्डी खेळाडू, पंच आणि क्रीडाप्रेमींनी सावध राहावे, असे स्पष्ट आवाहन नोंदणीकृत सिंधुदुर्ग जिल्हा कबड्डी असोसिएशन सावंतवाडी यांच्या वतीने एका प्रसिद्धीपत्रकाद्वारे करण्यात आले आहे.
सहाय्यक धर्मादाय आयुक्त, सिंधुदुर्ग यांच्या निर्णयानंतर संबंधित संस्थेची नोंदणी Public Trust Registration (PTR) मधून वगळण्यात आली असून, तिची मान्यता पूर्णपणे रद्द करण्यात आली आहे. त्यामुळे या संस्थेमार्फत आयोजित करण्यात येणाऱ्या कोणत्याही शिबिराला, प्रशिक्षणाला किंवा उपक्रमाला अधिकृत मान्यता उरलेली नाही, असा दावा असोसिएशनने केला आहे. या पार्श्वभूमीवर खेळाडू, पंच, प्रशिक्षक, क्रीडाप्रेमी आणि पालकांनी अशा अनधिकृत शिबिरांमध्ये अजिबात सहभागी होऊ नये, कोणत्याही प्रकारचे शुल्क भरू नये आणि अशा उपक्रमांच्या आमिषाला बळी पडू नये, असे प्रसिद्धीपत्रकात नमूद करण्यात आले आहे.
क्रीडा क्षेत्राची दिशाभूल टाळण्यासाठी असोसिएशनने पुढे स्पष्ट केले आहे की, कबड्डी खेळाशी संबंधित अधिकृत पंच परीक्षा, प्रशिक्षण शिबिरे आणि इतर सर्व क्रीडा उपक्रमांची विश्वासार्ह माहिती केवळ नोंदणीकृत सिंधुदुर्ग जिल्हा कबड्डी असोसिएशन, सावंतवाडी यांच्याकडूनच मिळवावी. अनधिकृत व्यक्ती किंवा संस्थांकडून आयोजित करण्यात येणाऱ्या क्रीडा उपक्रमांपासून सर्वांनी दूर राहावे, अशी माहिती नोंदणीकृत सिंधुदुर्ग जिल्हा कबड्डी असोसिएशनचे अध्यक्ष प्रसाद अरविंदेकर यांनी या प्रसिद्धीपत्रकाद्वारे दिली आहे.
दरम्यान, या प्रसिद्धीपत्रकामुळे जिल्ह्यातील संपूर्ण कबड्डी वर्तुळात चर्चेला उधाण आले असून, सोशल मीडियावर गाजत असलेल्या या शिबिराच्या वैधतेबाबत मोठे प्रश्नचिन्ह निर्माण झाले आहे. असोसिएशनच्या या खळबळजनक दाव्यानंतर आता संबंधित आयोजक काय भूमिका घेतात आणि यावर काय स्पष्टीकरण देतात, याकडे संपूर्ण जिल्ह्याचे लक्ष लागले आहे.
