जिल्हा परिषद मतदारसंघातील घराघरात गणेशपूजा साहित्य अन् कॅलेंडरचे वाटप; आमदार निलेश राणेंच्या हस्ते उपक्रमाचा शुभारंभ
सावंतवाडी,दि.०७: गणेश चतुर्थीचा उत्साह आणि भक्तीचा माहोल सर्वत्र पसरलेला असतानाच शिवसेना सावंतवाडी तालुका प्रमुख दिनेश गावडे यांनी आपली सामाजिक बांधिलकी यंदाही जपली आहे. त्यांनी आपल्या जिल्हा परिषद मतदारसंघातील घराघरात गणेशपूजा साहित्य, विघ्नहर्त्या गणरायाचे आकर्षक कॅलेंडर आणि पिशवीचे वाटप करण्याचा विशेष उपक्रम हाती घेतला असून, कुडाळ-मालवण मतदारसंघाचे आमदार डॉ. निलेश राणे यांच्या शुभहस्ते या उपक्रमाचा औपचारिक शुभारंभ करण्यात आला.
गणेशोत्सव हा केवळ धार्मिक सण न राहता समाजातील घटकांना एकत्र जोडणारा उत्सव व्हावा, या भावनेतून दिनेश गावडे यांच्या वतीने दरवर्षी गणेशभक्तांसाठी हा उपक्रम राबविला जातो. घराघरात गणरायाचे पूजन सुकर करण्यासोबतच शिवसेनेचा जनसंपर्क अधिक व्यापक आणि मजबूत करण्याचा प्रयत्न या उपक्रमाच्या माध्यमातून केला जात असल्याचे पाहायला मिळत आहे.
या शुभारंभप्रसंगी जिल्हा परिषद उपाध्यक्ष दादा साईल, शिवसेना जिल्हाप्रमुख दत्ता सामंत, नगराध्यक्ष प्राजक्ता शिरवलकर आणि निता राणे यांच्यासह शिवसेनेचे विविध पदाधिकारी व कार्यकर्ते मोठ्या संख्येने उपस्थित होते. गणेशोत्सवाच्या मंगल पर्वावर राबवल्या जाणाऱ्या या उपक्रमाचे स्थानिक नागरिक व गणेशभक्तांकडून जोरदार स्वागत होत असून, ‘गणरायाच्या सेवेतून जनतेशी थेट नातं’ जोडण्याचा दिनेश गावडे यांचा हा उपक्रम सध्या सर्वत्र चर्चेचा विषय ठरला आहे.
