विकासकामांना गती मिळण्याच्या दृष्टीने मासिक सभेत अभिनंदनाचा ठराव सर्वानुमते मंजूर
सावंतवाडी,दि.११: ग्रामपंचायत माजगाव कार्यक्षेत्रातील नागरी सुविधा आणि गावाच्या सर्वांगीण विकासासाठी १५ व्या वित्त आयोगांतर्गत तब्बल ४५ लाख रुपयांची विकासकामे मंजूर करण्यात आली आहेत. या भरीव निधीच्या उपलब्धतेमुळे माजगाव ग्रामपंचायतीच्या मासिक सभेत जिल्हा परिषद सदस्य श्री. विक्रांत विकासभाई सावंत यांच्या अभिनंदनाचा आणि आभार व्यक्त करण्याचा ठराव सर्वानुमते मंजूर करण्यात आला.
ग्रामपंचायत माजगावची मासिक सभा नुकतीच संपन्न झाली. या सभेत आयत्यावेळच्या विषयात १५ व्या वित्त आयोगांतर्गत ४५ लाख रुपयांचा निधी मंजूर करून आणल्याबद्दल जिल्हा परिषद सदस्य विक्रांत सावंत यांच्या अभिनंदनाचा विषय पटलावर ठेवण्यात आला होता. श्री. संजय विठ्ठल कानसे यांनी या ठरावाचे सूचक म्हणून काम पाहिले, तर श्री. रिचर्ड ॲन्थनी डिमेलो यांनी त्यास अनुमोदन दिले. त्यानंतर उपस्थित सर्व १० सदस्यांच्या साक्षीने हा ठराव सर्वानुमते मंजूर करण्यात आला.
मंजूर झालेल्या या निधीमुळे गावातील मुख्य तसेच प्रलंबित व आवश्यक विकासकामांना मोठी गती मिळणार असून ग्रामस्थांच्या सोयी-सुविधांमध्ये भरीव सुधारणा होणार आहे. एक कर्तव्यदक्ष लोकप्रतिनिधी म्हणून विक्रांत सावंत यांनी गावाच्या विकासासाठी दाखवलेली तत्परता आणि केलेले विशेष प्रयत्न कौतुकास्पद असल्याचे यावेळी नमूद करण्यात आले. या कार्याबद्दल सरपंच श्रीम. रंजना रवींद्र कानसे यांच्यासह समस्त ग्रामपंचायत सदस्यांनी त्यांचे मनापासून हार्दिक अभिनंदन करून मनःपूर्वक आभार व्यक्त केले आहेत.
