Home News ‘भारत पर्व’च्या राष्ट्रीय व्यासपीठावर कोकणचा डंका; मळगावच्या वृषाली रेडकर यांच्याकडे महाराष्ट्राच्या प्रतिनिधित्वाची...

‘भारत पर्व’च्या राष्ट्रीय व्यासपीठावर कोकणचा डंका; मळगावच्या वृषाली रेडकर यांच्याकडे महाराष्ट्राच्या प्रतिनिधित्वाची धुरा

0
1

केंद्रीय पर्यटन मंत्रालयाच्या महोत्सवात पीआयबी मुंबईतर्फे निवड; डिजिटल माध्यमातून कोकणची संस्कृती आणि पर्यटन देशभर पोहोचवल्याची दखल

सावंतवाडी,दि.१९: डिजिटल माध्यमाचा प्रभावी वापर करत कोकणची समृद्ध संस्कृती, परंपरा आणि पर्यटन वैभव जगासमोर आणणाऱ्या सावंतवाडी तालुक्यातील मळगाव येथील सौ. वृषाली सुधाकर रेडकर (कोकणची Russhali) यांनी राष्ट्रीय स्तरावर कोकणचा झेंडा फडकवला आहे. भारत सरकारच्या केंद्रीय पर्यटन मंत्रालयातर्फे आयोजित ‘भारत पर्व २०२६’ या प्रतिष्ठित राष्ट्रीय सांस्कृतिक महोत्सवात महाराष्ट्राचे प्रतिनिधित्व करण्याची महत्त्वाची जबाबदारी त्यांच्यावर सोपवण्यात आली होती. प्रेस इन्फॉर्मेशन ब्युरो (PIB), मुंबई यांच्या वतीने देशभरातील निवडक डिजिटल कंटेंट क्रिएटर्समध्ये त्यांची ही निवड करण्यात आली असून, सावंतवाडीसह संपूर्ण कोकणच्या दृष्टीने ही अत्यंत अभिमानास्पद बाब ठरली आहे.

गुजरातमधील एकतानगर येथे ३० ऑक्टोबर ते १५ नोव्हेंबर या कालावधीत हा भव्य महोत्सव संपन्न झाला. ‘एक भारत, श्रेष्ठ भारत’ या संकल्पनेवर आधारित या महोत्सवात देशातील विविध राज्यांची सांस्कृतिक विविधता, लोककला, हस्तकला आणि पर्यटनस्थळांचे दर्शन घडवण्यात आले. भारताचा समृद्ध सांस्कृतिक वारसा डिजिटल माध्यमांतून जागतिक स्तरावर पोहोचवण्याच्या उद्देशाने ‘इनक्रेडिबल इंडिया’ उपक्रमांतर्गत या क्रिएटर्सना आमंत्रित करण्यात आले होते.

या राष्ट्रीय व्यासपीठावर महाराष्ट्राची सांस्कृतिक ओळख प्रभावीपणे मांडण्याची संधी वृषाली रेडकर यांना मिळाली. विशेषतः कोकणचा निसर्ग, येथील वैशिष्ट्यपूर्ण लोकपरंपरा, खाद्यसंस्कृती आणि पर्यटनस्थळांना डिजिटल माध्यमांतून व्यापक प्रसिद्धी मिळवून देण्याच्या दृष्टीने त्यांचा हा सहभाग अत्यंत महत्त्वपूर्ण ठरला आहे. एका स्थानिक पातळीवरून सुरू झालेला त्यांचा हा डिजिटल प्रवास आज थेट राष्ट्रीय व्यासपीठापर्यंत जाऊन पोहोचला आहे.

वृषाली रेडकर यांचे हे यश केवळ वैयक्तिक नसून, कोकणातील नव्या पिढीच्या डिजिटल अभिव्यक्तीला आणि कलागुणांना राष्ट्रीय स्तरावर मिळालेली ती मोठी पावती मानली जात आहे. त्यांच्या या उल्लेखनीय निवडीमुळे सावंतवाडी तालुक्याच्या नावलौकिकात मोठी भर पडली असून, सर्वच स्तरांतून त्यांचे कौतुक आणि अभिनंदन होत आहे.

LEAVE A REPLY

Please enter your comment!
Please enter your name here