सावंतवाडी: जागतिक महिला दिन उत्साहात साजरा; मान्यवरांची लाभली प्रमुख उपस्थिती
सावंतवाडी,दि.१४: शहरातील सर्वोदय नगर येथे जागतिक महिला दिन अत्यंत उत्साहपूर्ण आणि प्रेरणादायी वातावरणात साजरा करण्यात आला. परिसरातील महिलांच्या उत्स्फूर्त सहभागामुळे आणि रहिवाशांच्या सहकार्यामुळे या कार्यक्रमाला एक आगळावेगळा रंग प्राप्त झाला होता. याप्रसंगी सर्वोदय नगरचे नगरसेवक अजय गोंदावळे तसेच नगरसेविका सौ. नीलम नाईक यांनी प्रमुख उपस्थिती दर्शवून कार्यक्रमाची शोभा वाढवली.
कार्यक्रमाची सुरुवात पारंपरिक पद्धतीने दीपप्रज्वलन करून करण्यात आली, त्यानंतर ईशस्तवन आणि स्वागत गीताने वातावरण भक्तिमय व मंगलमय झाले. महिलांच्या कर्तृत्वाचा गौरव करण्याच्या उद्देशाने यावेळी परिसरातील स्वावलंबी महिलांचा विशेष सत्कार करण्यात आला. यामध्ये महिला उद्योजिका सौ. ऋचा पाटणकर, सौ. सुनीता पावसकर, सौ. संयोगिता काळकुंद्रीकर, सौ. सुजल राऊळ आणि सौ. सपना पांढरे यांना मान्यवरांच्या हस्ते सन्मानित करण्यात आले. त्यांच्या कार्याची उपस्थितांनी टाळ्यांच्या कडकडाटात दाद दिली.
सर्वोदय नगर रहिवासी संघाच्या महिला अध्यक्षा सौ. दिशा कामत यांनी आपल्या प्रास्ताविकात महिला सक्षमीकरणाचे महत्त्व अधोरेखित केले. महिलांनी समाजाच्या सर्व क्षेत्रांत आत्मविश्वासाने पुढे यावे, असे आवाहन त्यांनी केले. नगरसेवक अजय गोंदावळे व नगरसेविका सौ. नीलम नाईक यांनीही उपस्थित महिलांना शुभेच्छा देताना समाजाच्या जडणघडणीत महिलांची भूमिका किती महत्त्वाची आहे, हे प्रभावी शब्दांत मांडले.
या सोहळ्याचे विशेष आकर्षण ठरले ते प्रा. रुपेश पाटील यांच्या मार्गदर्शनाखाली आयोजित करण्यात आलेले “खेळ पैठणी” स्पर्धेचे उत्कृष्ट नियोजन. महिलांनी या स्पर्धेत मोठ्या उत्साहाने सहभाग घेतल्यामुळे कार्यक्रमात एक वेगळेच चैतन्य निर्माण झाले होते. या स्पर्धेतील प्रथम क्रमांकाच्या मानाच्या पैठणीचे प्रायोजकत्व सर्वोदय नगर रहिवासी संघाचे अध्यक्ष सुनील राऊळ यांनी स्वीकारले होते, तर द्वितीय क्रमांकाचे प्रायोजकत्व नगरसेविका सौ. नीलम नाईक यांनी दिले होते.
अत्यंत चुरशीच्या ठरलेल्या या स्पर्धेत सौ. अनुश्री राणे यांनी प्रथम क्रमांक पटकावत मानाची पैठणी आपल्या नावे केली. सौ. स्वाती दुबळे यांनी द्वितीय, तर सौ. रोशनी गावडे यांनी तृतीय क्रमांक मिळवला. तसेच सौ. मानसी पिळणकर आणि डॉ. सौ. दीप्ती बुवा यांना उत्तेजनार्थ पारितोषिके देण्यात आली. विजेत्यांचा उत्साह आणि उपस्थितांचा प्रतिसाद यामुळे संपूर्ण परिसर आनंदाने दुमदुमून गेला होता.
कार्यक्रमाचे प्रभावी सूत्रसंचालन सौ. अमृता धुरी यांनी केले, तर सौ. अनुश्री राणे यांनी आभार प्रदर्शन केले. कार्यक्रमातील अविस्मरणीय क्षण टिपण्याचे काम कु. सबिना डिसूजा व निनाद नाईक यांनी उत्कृष्ट फोटोग्राफीद्वारे पार पाडले. सर्वोदय नगर संघाच्या सर्व कमिटी सदस्यांच्या परिश्रमांमुळे हा कार्यक्रम यशस्वी झाला. कार्यक्रमाची सांगता नगरसेवक अजय गोंदावळे व सौ. मेघना राऊळ यांच्या सुरेल व अप्रतिम गायनाने झाली, ज्याने उपस्थितांची मने जिंकली.
