जिल्ह्यात १० हजार वनराई बंधारे बांधण्याचे उद्दिष्ट; नुकसानग्रस्त बळीराजाला सरकार सर्वतोपरी मदत करणार : ना. नितेश राणे यांची ग्वाही
सावंतवाडी,दि.१७: राज्याचे मत्स्यव्यवसाय व बंदरे विकासमंत्री तथा सिंधुदुर्ग जिल्ह्याचे पालकमंत्री ना. नितेश राणे यांनी शुक्रवारी सायंकाळी सावंतवाडी शहर आणि परिसरातील विविध नवरात्रोत्सव मंडळांना भेटी देऊन आदिशक्ती दुर्गामातेचे दर्शन घेतले. यावेळी त्यांनी राज्यातील दुष्काळाचे सावट दूर होऊन बळीराजाला दिलासा मिळावा, अशी मनोभावे प्रार्थना केली. जिल्ह्यातील पाणीटंचाई व दुष्काळावर मात करण्यासाठी १० हजार वनराई बंधारे उभारण्याचे उद्दिष्ट असून, त्यापैकी ७ हजार बंधारे पूर्ण झाल्याची माहिती देत उर्वरित कामेही लवकरच पूर्ण केली जातील, असे त्यांनी स्पष्ट केले. तसेच मुख्यमंत्री देवेंद्र फडणवीस यांच्या नेतृत्वाखालील राज्य सरकार दुष्काळग्रस्त शेतकऱ्यांच्या पाठीशी खंबीरपणे उभे असून त्यांना सर्वतोपरी मदत केली जाईल, असा विश्वासही त्यांनी यावेळी व्यक्त केला.
पालकमंत्री ना. नितेश राणे यांनी सावंतवाडी शहरातील माठेवाडा येथील आत्मेश्वर मंदिरात स्थानापन्न केलेल्या नवदुर्गेचे तसेच कोलगाव पांडवनगरी येथील श्री देव वस नवरात्रोत्सव मंडळाच्या दुर्गामातेचे मनोभावे दर्शन घेतले. देवीचरणी लीन होत त्यांनी राज्यातील शेतकरी व जनतेला संकटातून मुक्त करण्याचे साकडे घातले. पाणी संवर्धनाच्या मोहिमेत जिल्ह्यातील नागरिकांनीही सक्रिय सहभाग नोंदवावा, असे आवाहन त्यांनी यावेळी केले.
याप्रसंगी जिल्हा बँक अध्यक्ष मनीष दळवी, ज्येष्ठ कार्यकर्ते पुखराज पुरोहित, शहर मंडल अध्यक्ष सुधीर आडीवरेकर, सभापती आनंद नेवगी, मोहिनी मडगावकर, दिपाली भालेकर, नगरसेवक प्रतीक बांदेकर, ॲड. सिद्धार्थ भांबुरे, नगरसेविका दुलारी रांगणेकर, नीलम नाईक, सुकन्या टोपले, सुनिता पेडणेकर, माजी नगरसेवक उदय नाईक, नंदू गावडे, विराग मडकईकर, मंडळाचे अध्यक्ष ज्येष्ठ पत्रकार सागर चव्हाण, बाबुराव चव्हाण, संतोष गांवस, किशोर चिटणीस, कृष्णा धुळपणवार, बाळ चोणकर यांच्यासह स्थानिक नागरिक, महिला आणि भाविक मोठ्या संख्येने उपस्थित होते.
