महिला सक्षमीकरण, आरोग्य आणि ‘नारीशक्ती @ २०४७’ वर विचारमंथन; मर्दानी खेळांची साहसी प्रात्यक्षिके ठरली आकर्षण
सावंतवाडी, दि.१७: युवतींच्या व्यक्तिमत्त्व विकासाला चालना देत त्यांच्यात आत्मविश्वास, साहस आणि नेतृत्वगुण रुजवण्यासाठी अखिल भारतीय विद्यार्थी परिषद सिंधुदुर्ग जिल्ह्याच्या वतीने आयोजित जिल्हास्तरीय ‘सिंधूशक्ती युवती संमेलन’ येथील बॅरिस्टर नाथ पै सभागृहात उत्साहात पार पडले. महिला शिक्षण, आरोग्य, करिअर संधी आणि विकसित भारताच्या उभारणीतील महिलांचे योगदान यावर रंगलेल्या परिसंवादांसोबतच मर्दानी खेळ व ‘मिशन साहसी’च्या प्रात्यक्षिकांनी या संमेलनाला विशेष रंगत आणली.
कार्यक्रमाच्या सुरुवातीला प्रमुख आयोजक प्रणिता परब यांनी प्रास्ताविकातून परिषदेची भूमिका आणि संमेलनाचा मुख्य हेतू स्पष्ट केला, तर ॲड. श्रीशा कुलकर्णी यांनी ‘पंच परिवर्तन’ या विषयावर भाष्य करत समाजपरिवर्तनातील प्रत्येक नागरिकाचे दायित्व विषद केले. याप्रसंगी अखिल भारतीय विद्यार्थी परिषदेच्या कोकण प्रांत सहमंत्री आशी गुप्ता यांची प्रमुख उपस्थिती लाभली होती.
संमेलनात आयोजित पहिल्या परिसंवादात उपजिल्हाधिकारी सौ. आरती देसाई, वनपरिक्षेत्र अधिकारी सौ. नेहा मुरकुटे आणि सावंतवाडीच्या नगराध्यक्षा सौ. श्रद्धाराजे भोसले यांनी सहभाग घेतला. प्रशासकीय सेवेतील प्रवेशाची पूर्वतयारी, करिअरमधील आव्हाने आणि प्रत्यक्ष कामाच्या अनुभवांवरून त्यांनी युवतींना उद्बोधक मार्गदर्शन करत ध्येयनिश्चितीची प्रेरणा दिली. दुसऱ्या सत्रात डॉ. रश्मी कार्लेकर, डॉ. गौरी गणपत्ये आणि डॉ. मेधा फणसळकर यांनी महिला आरोग्य, उच्च शिक्षण आणि सामाजिक भूमिका यावर सखोल चर्चा केली. ‘नारीशक्ती @ २०४७’ या संकल्पनेच्या आधारे विकसित भारताच्या निर्मितीत महिलांचा सक्रिय सहभाग कसा निर्णायक ठरेल, यावरही यावेळी मंथन झाले.
युवतींमध्ये निर्भयता आणि स्वसंरक्षणाची भावना दृढ करण्यासाठी सादर करण्यात आलेली मर्दानी खेळांची प्रात्यक्षिके आणि ‘मिशन साहसी’चे सादरीकरण विशेष लक्षवेधी ठरले. संकटांचा कणखरपणे सामना करण्याचे धैर्य देणारे आणि युवतींमधील सुप्त गुणांना वाव देणारे हे संमेलन उपस्थित विद्यार्थिनींसाठी नवी ऊर्जा व दिशा देणारे ठरले.
