विद्यार्थी, शिक्षक आणि ग्रामस्थांच्या संयुक्त सहभागातून निरवडे येथे उपक्रम संपन्न; परिसरातून कौतुकाचा वर्षाव
सावंतवाडी,दि.१७: पाणी टंचाईच्या समस्येवर मात करण्यासाठी आणि पावसाचे पाणी अडवून भूजल पातळी वाढवण्यासाठी संस्कार नॅशनल स्कूल, निरवडे येथील स्काऊट-गाईड पथकातील विद्यार्थ्यांनी प्रत्यक्ष श्रमदानातून वनराई बंधारा बांधत जलसंवर्धनाचा आदर्श वस्तुपाठ घालून दिला आहे. भविष्यातील दुष्काळाची दाहकता ओळखून पाणी अडवणे, जिरवणे आणि त्याचा काटकसरीने वापर करणे याविषयी विद्यार्थ्यांनी कृतीतून जनजागृती घडवून आणली. शालेय शिक्षणासोबतच श्रमप्रतिष्ठा, सामाजिक बांधिलकी आणि पर्यावरण संरक्षणाचे मूल्य रुजवणारा हा उपक्रम पंचक्रोशीत कौतुकाचा विषय ठरला आहे.
या उपक्रमात विद्यार्थ्यांसोबत स्थानिक लोकप्रतिनिधी आणि शिक्षकांनीही उत्स्फूर्त सहभाग नोंदवला. निरवडे गावच्या सरपंच श्रीमती सुहानी गावडे व त्यांच्या सहकाऱ्यांसह प्रशालेच्या मुख्याध्यापिका प्रणाली रेडकर, समन्वयक अजय बांदेकर, सहाय्यक शिक्षक मनीष सावंत, योगेश येरम, साईश तारी आणि विद्यार्थ्यांनी प्रत्यक्ष मैदानात उतरून बंधारा बांधण्याचे काम पूर्णत्वास नेले. जलसंधारणाची खरी गरज अधोरेखित करणाऱ्या आणि भावी पिढीमध्ये पर्यावरणाची जाणीव निर्माण करणाऱ्या या स्तुत्य उपक्रमाचे सर्व स्तरांतून अभिनंदन होत आहे.
