सावंतवाडी,दि.१५: सावंतवाडी पोलीस ठाण्याच्या हद्दीत काल राबविण्यात आलेल्या ‘ऑल आऊट ऑपरेशन’मुळे अवैध धंदे करणाऱ्यांचे धाबे दणाणले आहेत. या धडक मोहिमेत पोलिसांनी अवैध दारू विक्री, वाहतूक आणि मटका जुगारावर जोरदार प्रहार करत हजारो रुपयांचा मुद्देमाल जप्त केला असून पाच जणांविरुद्ध गुन्हे दाखल केले आहेत.
या मोहिमेदरम्यान सातार्डा रायचे पेड (कारवी वाडी) येथे चेतन पिळणकर याच्याकडून १५०० रुपये किमतीच्या १५ दारूच्या बाटल्या जप्त करण्यात आल्या. तसेच तळवडे गडगेवाडी येथे शंकर विठ्ठल मांजरेकर हा आपल्या घराच्या पाठीमागील विहिरीजवळ ५७०० रुपये किमतीच्या ४८ दारूच्या बाटल्यांची विनापरवाना विक्री करताना रंगेहाथ आढळला. कोलगाव नाईक बाग धुरीटेम परिसरातही रामचंद्र वसंत सावंत याच्या ताब्यातून २३०० रुपये किमतीच्या २३ दारूच्या बाटल्या जप्त करण्यात आल्या आहेत.
सर्वात मोठी कारवाई आंबोली चेक पोस्ट येथे करण्यात आली. गोवा ते कोल्हापूर प्रवासादरम्यान शुभम अजित कुमार मुधा (वय ४४, रा. हातकणंगले) हा आपल्या सुझुकी Access दुचाकीवरून (MH 51 E 6290) सुमारे २५,००० रुपये किमतीच्या ८० दारूच्या बाटल्यांची विनापरवाना वाहतूक करताना सापडला. पोलिसांनी या कारवाईत दारूसह ७०,००० रुपये किमतीची दुचाकीही जप्त केली आहे. दुसरीकडे, सालईवाडा येथे मटका जुगार चालविणाऱ्या शेखर बाबाजी नलावडे याला २६०० रुपयांच्या साहित्यासह ताब्यात घेण्यात आले.
या संपूर्ण कारवाईत ४ जणांविरुद्ध दारूबंदी कायद्याखाली तर एकाविरुद्ध जुगार कायद्याखाली गुन्हे नोंदवण्यात आले आहेत. एपीआय पंकज शिंदे, जमादार टाकेकर, हवालदार अनिल धुरी, जाधव, राऊत, शिंदे, शिंगाडे आणि प्रकाश कदम यांच्या पथकाने ही मोहीम यशस्वी केली. पोलिसांच्या या आक्रमक पवित्र्यामुळे अवैध व्यवसाय करणाऱ्यांमध्ये मोठी खळबळ उडाली असून, आगामी काळात ही मोहीम अधिक तीव्र करण्याचे संकेत प्रशासनाने दिले आहेत.
