सावंतवाडी,दि.१२: सावंतवाडी तालुक्यातील शेर्ले पंचायत समिती मतदारसंघातून भारतीय जनता पक्षाचे जिल्हा चिटणीस महेश धुरी यांची बिनविरोध निवड झाली असून, आज त्यांनी आपल्या निवडीचे अधिकृत प्रमाणपत्र प्रांताधिकारी समीर घारे यांच्याकडून स्वीकारले. महेश धुरी यांच्या या बिनविरोध विजयामुळे शेर्ले मतदारसंघात भाजपची संघटनात्मक पकड आणि ताकद पुन्हा एकदा निर्विवादपणे सिद्ध झाली आहे. यावेळी सकल हिंदू व मराठा समाजाचे जिल्हाध्यक्ष तथा ज्येष्ठ पत्रकार सीताराम गावडे आणि नायब तहसीलदार मनोज मुसळे प्रामुख्याने उपस्थित होते.
भाजपचे बांदा मंडळ अध्यक्ष म्हणून सलग दोन वेळा जबाबदारी सांभाळताना महेश धुरी यांनी संघटन पातळीवर अत्यंत प्रभावी कामगिरी केली होती. कार्यकर्त्यांशी असलेला त्यांचा दांडगा जनसंपर्क आणि निवडणूक व्यवस्थापनातील त्यांचे कौशल्य यामुळे पक्षाला या भागात मोठी मजबूती मिळाली आहे. त्यांच्या याच निष्ठेची दखल घेत पक्षाने त्यांना शेर्ले पंचायत समिती रिंगणात उतरवले होते. मात्र, धुरी यांचे नाव निश्चित होताच त्यांच्या जनसंपर्काचा धसका घेत आणि त्यांच्याप्रती असलेल्या आदरापोटी प्रतिस्पर्धी उमेदवारांनी आपली उमेदवारी मागे घेतली. परिणामी, ही निवडणूक बिनविरोध पार पडली.
विशेष म्हणजे, निवडीची घोषणा होऊनही धुरी यांनी तात्काळ प्रमाणपत्र स्वीकारले नव्हते. भाजपचे जिल्हा सरचिटणीस महेश सारंग यांचा कोलगाव जिल्हा परिषद मतदारसंघातून पराभव झाल्याने, धुरी यांनी आपल्या सहकाऱ्याप्रती आदर व्यक्त करत कोणताही सत्कार स्वीकारणार नसल्याचे जाहीर केले होते. राजकीय यशापेक्षाही आपल्या सहकाऱ्याच्या पराभवाचे दुःख महत्त्वाचे मानत त्यांनी घेतलेल्या या भूमिकेचे सर्वत्र कौतुक होत आहे. या बिनविरोध विजयाने शेर्ले परिसरात भाजप कार्यकर्त्यांमध्ये उत्साहाचे वातावरण निर्माण झाले आहे.
