प्रवेश प्रक्रियेबाबत विद्यार्थी-पालकांना मिळाले तज्ज्ञांचे मार्गदर्शन
सावंतवाडी,दि.१०: महाराष्ट्र शासनाच्या राज्य सामाईक प्रवेश परीक्षा (सीईटी) कक्ष, मुंबई यांच्या वतीने शैक्षणिक वर्ष २०२६-२७ साठीच्या केंद्रीभूत प्रवेश प्रक्रिया (CAP) संदर्भातील विभागीय सुसंवाद कार्यक्रम आज यशवंतराव भोसले इन्स्टिट्यूट ऑफ टेक्नॉलॉजी येथे मोठ्या उत्साहात संपन्न झाला. व्यावसायिक अभ्यासक्रमांच्या प्रवेश प्रक्रियेबाबत निर्माण होणारे संभ्रम दूर करण्यासाठी आयोजित या कार्यक्रमास विद्यार्थी व पालकांनी प्रचंड प्रतिसाद दिला.
कार्यक्रमाचे उद्घाटन दीपप्रज्वलनाने आणि शारदा पूजनाने करण्यात आले. यावेळी व्यासपीठावर तंत्र शिक्षण विभागाचे परीक्षा समन्वयक कुणाल देवकर, कला शिक्षण विभागाचे सहाय्यक परीक्षा समन्वयक शार्दुल कदम, वैद्यकीय व आयुष विभागाचे सिद्धेश नर, उच्च शिक्षण विभागाचे नानासाहेब फटांगरे आणि तंत्र शिक्षण विभागाचे पी. एम. झरकर उपस्थित होते. तसेच यशवंतराव भोसले इन्स्टिट्यूटचे प्राचार्य डॉ. रमण बाणे, उपप्राचार्य गजानन भोसले व फार्मसी कॉलेजचे प्राचार्य डॉ. विजय जगताप यांनीही उपस्थिती लावली.
प्रास्ताविक करताना पी. एम. झरकर यांनी सांगितले की, प्रवेश प्रक्रियेतील पारदर्शकता वाढवणे आणि शासनाची अधिकृत माहिती थेट विद्यार्थ्यांपर्यंत पोहोचवणे हा या सुसंवाद कार्यक्रमाचा मुख्य उद्देश आहे. त्यानंतर विविध विभागांच्या तज्ज्ञांनी सविस्तर मार्गदर्शन केले. शार्दुल कदम यांनी फाईन आर्ट्समधील करिअर संधींची माहिती दिली, तर सिद्धेश नर यांनी एमबीबीएस, बीडीएस आणि बीएचएमएस यांसारख्या वैद्यकीय अभ्यासक्रमांच्या प्रवेशातील बारकावे स्पष्ट केले. तंत्र शिक्षण विभागाचे कुणाल देवकर यांनी अभियांत्रिकी, फार्मसी व आर्किटेक्चर प्रवेशासाठीच्या कॅप फेऱ्या, कागदपत्र पडताळणी आणि अभ्यासक्रम निवडीबाबत विद्यार्थ्यांना महत्त्वाचे मार्गदर्शन दिले.
सत्राच्या उत्तरार्धात विद्यार्थी आणि पालकांनी विचारलेल्या विविध शंकांचे तज्ज्ञांनी समाधानकारक निरसन केले. अशा प्रकारच्या थेट संवादामुळे प्रवेश प्रक्रियेतील भीती कमी होऊन आत्मविश्वास वाढल्याची भावना उपस्थित पालकांनी व्यक्त केली. कार्यक्रमाचे सूत्रसंचालन व आभार प्रदर्शन सहाय्यक प्राध्यापक बॉनी शेरॉव्ह यांनी केले. संस्थेच्या सर्व प्राध्यापक व कर्मचाऱ्यांच्या सहकार्याने हा मार्गदर्शन सोहळा यशस्वीरीत्या पार पडला.
