सावंतवाडी,दि.०९: सावंतवाडी तालुक्यातील माडखोल जिल्हापरिषद मतदारसंघाच्या निवडणुकीत राजकीय समीकरणे पूर्णपणे बदलल्याचे पाहायला मिळत आहे. या मतदारसंघात प्रस्थापित पक्षांना धक्का देत अपक्ष उमेदवारांनी जोरदार मुसंडी मारली असून, तिन्ही जागांवर अपक्षांनी विजय मिळवला आहे. विशेष म्हणजे, विजयी झालेले तिन्ही उमेदवार भाजपचे बंडखोर असल्याने राजकीय वर्तुळात मोठी खळबळ माजली आहे.
माडखोल जिल्हापरिषद मतदारसंघातून अपक्ष उमेदवार शिवानी संजय नाईक यांनी दणदणीत विजय संपादन केला आहे. प्रचाराच्या सुरुवातीपासूनच त्यांनी मतदारसंघात वैयक्तिक संपर्क आणि दांडगा जनसंपर्क ठेवला होता, ज्याचे रूपांतर आता विजयात झाले आहे.
केवळ जिल्हा परिषदच नव्हे, तर पंचायत समितीच्या दोन्ही जागांवरही अपक्ष उमेदवारांनी आपले वर्चस्व सिद्ध केले आहे.
अवनी राऊळ आणि प्रथमेश सावंत या दोन अपक्ष उमेदवारांनी पंचायत समिती निवडणुकीत बाजी मारली आहे.
बंडखोरीचा भाजपला फटका?
विजयी झालेले हे तिन्ही उमेदवार मूळचे भाजपचे असून, पक्षांतर्गत निर्णयांना विरोध करत त्यांनी अपक्ष म्हणून निवडणूक लढवली होती. माडखोल मतदारसंघातील मतदारांनी अधिकृत पक्षीय उमेदवारांपेक्षा या बंडखोर अपक्ष उमेदवारांवर विश्वास दाखवल्याचे चित्र निकालातून स्पष्ट होत आहे. या निकालामुळे माडखोलमध्ये ‘अपक्षांचाच बोलबाला’ असल्याचे सिद्ध झाले असून आगामी काळात तालुक्यातील राजकीय समीकरणे कशी बदलतात, याकडे सर्वांचे लक्ष लागले आहे.
