बबन साळगावकर यांच्याकडे स्वागत समितीचे अध्यक्षपद
सावंतवाडी,दि.०८: ओंकार कला मंच आणि पाटणकर एज्युकेशन ट्रस्ट यांच्या संयुक्त विद्यमाने आयोजित करण्यात आलेल्या ‘मालवणी करंडक’ महोत्सवाच्या निमित्ताने सावंतवाडी शहरात खाद्यप्रेमींसाठी मोठी पर्वणी लाभणार आहे. येत्या २७, २८ फेब्रुवारी आणि १ मार्च अशा तीन दिवसांच्या कालावधीत भव्य ‘फूड फेस्टिवल’चे आयोजन करण्यात आले आहे. या संपूर्ण महोत्सवाच्या स्वागत समिती अध्यक्षपदी शहराचे माजी नगराध्यक्ष बबन साळगावकर यांची एकमताने निवड करण्यात आली असून, त्यांच्या अनुभवाचा फायदा या महोत्सवाला मिळणार आहे.
महोत्सवाच्या नियोजनासाठी नुकतीच समिती सदस्यांची महत्त्वाची बैठक पार पडली. या बैठकीला अध्यक्ष अमोल टेंबकर, उपाध्यक्ष ऋजूल पाटणकर, दादा मडकईकर, सचिव भुवन नाईक, सहसचिव सचिन मोरजकर, खजिनदार श्रेयस मुंज यांच्यासह निरंजन सावंत, आनंद काष्टे, निखिल माळकर, सावली पाटकर, हेमंत पांगम, साहिल सावंत, भालचंद्र लांबर, मृणाल पावसकर आणि प्रणव तारी उपस्थित होते. या बैठकीत फूड फेस्टिवलच्या स्वरूपावर सविस्तर चर्चा करण्यात आली.
या फूड फेस्टिवलमध्ये खवय्यांसाठी चवीची मोठी मेजवानी उपलब्ध करून दिली जाणार आहे. यात प्रामुख्याने अस्सल कोकणी पदार्थांसह, मालवणी तडका असलेले चायनीज आणि इतर विविध चविष्ट पदार्थांचे स्टॉल्स उभारले जाणार आहेत. केवळ खाद्यसंस्कृतीच नव्हे, तर कलेचा वारसा जपण्यासाठी आयोजित या महोत्सवात अनेक एकांकिका संघांनी सहभाग दर्शवला आहे. लवकरच या स्पर्धेतील संघांची अधिकृत घोषणा केली जाणार आहे. तसेच महोत्सवाचे औचित्य साधून विविध क्षेत्रात यश संपादन करणाऱ्या पाच नामवंत कलाकारांचा विशेष पुरस्कार देऊन गौरव करण्यात येणार आहे.
स्वागत समितीचे नवनिर्वाचित अध्यक्ष बबन साळगावकर यांच्या माध्यमातून या महोत्सवाला विविध क्षेत्रातील मान्यवरांना आमंत्रित केले जाणार आहे. दरम्यान, या फूड फेस्टिवलमध्ये आपले स्टॉल्स लावण्यासाठी इच्छुक असलेल्या व्यावसायिकांनी अधिक माहिती आणि नोंदणीसाठी ९९२२३१६७७७ या भ्रमणध्वनी क्रमांकावर संपर्क साधावा, असे आवाहन आयोजकांच्या वतीने करण्यात आले आहे.
