सावंतवाडी नागरी कृती समितीतर्फे गौरव; ३५ वर्षांच्या निर्भीड आणि समाजाभिमुख पत्रकारितेची दखल
सावंतवाडी, दि.२६: समाजातील वाईट प्रवृत्ती, अमली पदार्थांचे वाढते जाळे आणि अवैध धंद्यांविरोधात आपल्या लेखणीच्या माध्यमातून सातत्याने आवाज उठविणारे ‘कोकण लाईव्ह ब्रेकिंग न्यूज’ चॅनेलचे ज्येष्ठ पत्रकार तथा संपादक सीताराम गावडे यांना ‘सिंधुदुर्ग रत्न’ पुरस्काराने सन्मानित करण्यात आले आहे. सावंतवाडी नागरी कृती समिती, सिंधुदुर्ग यांच्या वतीने विविध क्षेत्रांत उल्लेखनीय कार्य करणाऱ्या व्यक्तींचा गौरव करण्यासाठी आयोजित करण्यात आलेल्या विशेष कार्यक्रमात हा सन्मान प्रदान करण्यात आला.
गेल्या ३५ वर्षांपासून समाजाभिमुख पत्रकारिता करताना सीताराम गावडे यांनी सामाजिक प्रश्नांना सातत्याने वाचा फोडली आहे. विशेषतः युवा पिढीला विळखा घालणारे अमली पदार्थ, गांजा, चरस तसेच विविध अवैध धंद्यांविरोधात त्यांनी आपल्या लेखणीतून सातत्याने जनजागृती केली. समाजाच्या हितासाठी चुकीच्या प्रवृत्तींवर थेट प्रहार करणाऱ्या त्यांच्या या निर्भीड पत्रकारितेची दखल घेत नागरी कृती समितीने त्यांना या सर्वोच्च सन्मानाने गौरवले.
पत्रकारितेचा उपयोग केवळ घडलेल्या घटना मांडण्यासाठी न करता, समाजातील गंभीर प्रश्न प्रशासन आणि जनतेसमोर आणण्यासाठी केला पाहिजे, या भूमिकेतून गावडे सातत्याने लिखाण करीत आहेत. अमली पदार्थांच्या विळख्यात अडकणाऱ्या तरुणाईच्या भवितव्याबाबत त्यांनी अनेकदा चिंता व्यक्त करत प्रखर जनजागृतीची भूमिका घेतली आहे. या पुरस्कारामुळे समाजातील गैरप्रवृत्तींविरोधात निर्भीडपणे लिखाण करणाऱ्या खऱ्या पत्रकारितेचा आणि समाजजागृतीच्या लढ्यांचा योग्य सन्मान झाल्याची भावना यावेळी उपस्थितांकडून व्यक्त करण्यात आली.
या सोहळ्यात पत्रकारितेसोबतच गणपती कलाकार, भजनी कलाकार, सजावट कलाकार, क्रीडा, शैक्षणिक, आरोग्य, सामाजिक, राजकीय आणि सांस्कृतिक क्षेत्रात उल्लेखनीय योगदान देणाऱ्या विविध व्यक्तींचाही सत्कार करण्यात आला.
या कार्यक्रमास भाजप युवा नेते विशाल परब, भाजप जिल्हा उपाध्यक्ष तथा जिल्हा परिषद सदस्य संदिप गावडे, उपनगराध्यक्ष ॲड. अनिल निरवडेकर, नगरसेवक देव्या सूर्याजी, नगरसेवक अजय गोंदावळे, नगरसेविका सौ. दीपाली भालेकर, माजी नगरसेविका सौ. कीर्ती बोंद्रे, माजी उपनगराध्यक्ष उमाकांत वारंग, माजी नगरसेवक तानाजी वाडकर, श्रीराम कोटकर, भाजप युवा मोर्चाचे शहराध्यक्ष हितेन नाईक, सावंतवाडी नागरी कृती समितीचे जिल्हाध्यक्ष सुनील पेडणेकर, सेक्रेटरी श्रीपाद सावंत, उपाध्यक्ष ॲड. राजू कासकर, वसंत जाधव सर तसेच मूर्तिकार संघटनेचे जिल्हाध्यक्ष बापू सावंत यांसह अनेक मान्यवर उपस्थित होते.
