प्राथमिक शाळेला ब्लूटूथ स्पीकर, माजी सैनिकांना हुतात्मा स्मारक प्रतिमा तर मठासाठी इन्व्हर्टरची भेट; राऊळ यांच्याकडून सर्व शुभचिंतकांचे आभार
सावंतवाडी, दि.११: माडखोल गावचे उपसरपंच तथा माडखोल सोसायटीचे चेअरमन सन्माननीय कृष्णा उर्फ जीजी राऊळ यांचा वाढदिवस विविध समाजोपयोगी उपक्रमांचे आयोजन करून अत्यंत थाटामाटात आणि उत्साहात साजरा करण्यात आला. केवळ उत्सव न करता सामाजिक भान जपत राऊळ यांनी आपल्या वाढदिवसाचे औचित्य साधून संपूर्ण गावाला आणि उपस्थितांना महत्त्वपूर्ण वस्तूंची ‘रिटर्न गिफ्ट’ म्हणून भेट देत एक अनोखा आदर्श निर्माण केला आहे.
या वाढदिवसानिमित्त माडखोल येथील प्राथमिक शाळा क्र. १ मधील विद्यार्थ्यांना फळ वाटप 
तसेच शैक्षणिक प्रक्रियेत आणि विविध सांस्कृतिक कार्यक्रमांत मदत व्हावी, या हेतूने ब्लूटूथ स्पीकर भेट देण्यात आला. तसेच माडखोल गावातील माजी सैनिकांच्या अतुलनीय सेवेचा गौरव करत त्यांना हुतात्मा स्मारक प्रतिमा प्रदान करून सन्मानित करण्यात आले. याशिवाय, माडखोल येथील श्री स्वामी समर्थ मठातील विजेची सोय अधिक बळकट व्हावी, या उद्देशाने मठासाठी इन्व्हर्टर व बॅटरी भेट म्हणून देण्यात आली.
या प्रसंगी आयोजित कार्यक्रमात नागरिक, कार्यकर्ते आणि ग्रामस्थांनी मोठी गर्दी करत कृष्णा राऊळ यांच्यावर शुभेच्छांचा वर्षाव केला. यावेळी मिळालेले उदंड प्रेम, शुभेच्छा आणि मोलाचे सहकार्य याबद्दल उपसरपंच कृष्णा राऊळ यांनी आपल्या सर्व मित्रपरिवाराचे, ग्रामस्थांचे व शुभचिंतकांचे मनःपूर्वक आणि हार्दिक आभार व्यक्त केले. राऊळ यांच्या या सामाजिक उपक्रमांचे संपूर्ण परिसरातून कौतुक होत आहे.
