सावंतवाडी,दि.१४: सावंतवाडी येथील बॅरिस्टर नाथ पै सभागृहात झालेली पंचायत समितीची आमसभा आज विविध समस्यांवरील वादळी चर्चेने चांगलीच गाजली. आमदार दीपक केसरकर यांच्या प्रमुख उपस्थितीत पार पडलेल्या या सभेत विविध गावांतील सरपंच, उपसरपंच, माजी सरपंच, ग्रामपंचायत सदस्य तसेच सामाजिक कार्यकर्त्यांनी आपापल्या भागातील नागरी समस्या आणि प्रश्नांचा अक्षरशः पाढाच वाचला. या संपूर्ण सभेत सावंतवाडीतील बहुचर्चित मल्टीस्पेशालिटी हॉस्पिटलचा मुद्दा पुन्हा एकदा ऐरणीवर आल्याचे पाहायला मिळाले.
हॉस्पिटलच्या केवळ घोषणा आणि वेळोवेळी दिल्या जाणाऱ्या तारखांना आता नागरिक पूर्णपणे वैतागले असून, नेमके हे मल्टीस्पेशालिटी हॉस्पिटल कधी उभे राहणार? असा संतप्त सवाल या सभेत उपस्थित करण्यात आला. याच मुद्द्यावरून वेत्ये गावाचे आदर्श युवा सरपंच गुणाजी गावडे यांनी थेट आमदार दीपक केसरकर यांच्यासमोरच अत्यंत आक्रमक भूमिका घेतली. “मल्टीस्पेशालिटी हॉस्पिटलसाठी आता तरी बाप्पा पावणार काय? अजून किती तारखा दिल्या जाणार?” असा खणखणीत सवाल करत त्यांनी लोकप्रतिनिधींना धारेवर धरले. गुणाजी गावडे यांच्या या थेट आणि आक्रमक सवालामुळे सभागृहातील वातावरण काही काळ चांगलेच तापले होते. सावंतवाडीकरांच्या आरोग्याशी संबंधित हा अत्यंत संवेदनशील व महत्त्वाचा विषय असून, आता केवळ आश्वासनांची खैरात नको तर प्रत्यक्ष कामाला सुरुवात कधी होणार, याचे स्पष्ट उत्तर मिळणे गरजेचे असल्याचे त्यांनी सभागृहाच्या निदर्शनास आणून दिले.
सरपंच गुणाजी गावडे यांनी उपस्थित केलेल्या या आक्रमक सवालाला उत्तर देताना माजी मंत्री तथा आमदार दीपक केसरकर यांनी या विषयावर प्रशासकीय व कायदेशीर बाजू मांडली. मल्टीस्पेशालिटी हॉस्पिटलच्या संदर्भातील अंतिम निर्णय हा न्यायालयीन प्रक्रियेशी संबंधित असल्याचे स्पष्ट करत आमदार केसरकर म्हणाले की, या संदर्भात लवकरच कोर्टाचा निर्णय होईल आणि कोर्टाच्या निर्णयानंतर सावंतवाडीत मल्टीस्पेशालिटी हॉस्पिटल नक्कीच साकारले जाईल, असे ठाम आश्वासन त्यांनी दिले. आमदारांच्या या स्पष्टीकरणानंतर आता सर्व सावंतवाडीकरांचे लक्ष कोर्टाच्या निर्णयाकडे लागले असून, गेल्या अनेक वर्षांपासून सुरू असलेल्या मल्टीस्पेशालिटी हॉस्पिटलच्या प्रतीक्षेला अखेर कधी पूर्णविराम मिळणार, हा सवाल संपूर्ण तालुक्यात पुन्हा एकदा चर्चेच्या केंद्रस्थानी आला आहे.
