बांदा केंद्रप्रमुखपदी पदोन्नती झाल्याबद्दल शिक्षक अमोल पाटील यांचा सत्कार
सावंतवाडी,दि.२७: इन्सुली केंद्रांतर्गत शैक्षणिक वर्ष २०२६-२७ मधील पहिली शिक्षण परिषद शनिवार, २७ जून रोजी केंद्र शाळा इन्सुली क्रमांक ४ येथे अतिशय उत्साहपूर्ण आणि शिस्तबद्ध वातावरणात पार पडली. या परिषदेत नवीन अभ्यासक्रम, शाळापूर्व तयारी, सेतू अभ्यासक्रम, प्रशासकीय कामकाज तसेच चालू शैक्षणिक वर्षातील नियोजनाबाबत शिक्षकांना सविस्तर मार्गदर्शन करण्यात आले.
परिषदेची सुरुवात उपस्थित मान्यवरांच्या हस्ते दीपप्रज्वलनाने झाली. यावेळी व्यासपीठावर केंद्रप्रमुख श्री. ठाकूर सर, केंद्र मुख्याध्यापक रुपेश परब, उच्च श्रेणी मुख्याध्यापिका नेहा सावंत, सुषमा गावडे व रूपाली गवस प्रामुख्याने उपस्थित होत्या.
या परिषदेत केंद्र मुख्याध्यापक रुपेश परब यांनी नवीन अभ्यासक्रम प्रशिक्षण, शाळापूर्व तयारी, सेतू अभ्यासक्रम तसेच केंद्र संसाधन समूहाच्या पुनर्गठनासह शिक्षकांच्या जबाबदाऱ्यांविषयी सविस्तर माहिती दिली. तर इन्सुली क्रमांक २ शाळेच्या शिक्षिका रक्षा देसाई यांनी शिक्षण परिषदेची प्रभावी अंमलबजावणी कशी करावी, विषयनिहाय नियोजन, शालेय वेळापत्रक आणि ‘आयडॉल शिक्षक’ निवड प्रक्रियेबाबत शिक्षकांना सविस्तर मार्गदर्शन केले. केंद्रप्रमुख श्री. ठाकूर यांनी शाळांचे प्रशासकीय कामकाज, शासनाच्या विविध योजना आणि आगामी शैक्षणिक उपक्रमांबाबत शिक्षकांना महत्त्वपूर्ण सूचना देत मार्गदर्शन केले.
याच परिषदेचे औचित्य साधून, इन्सुली केंद्रातील शिक्षक अमोल पाटील यांची बांदा केंद्रप्रमुखपदी पदोन्नती झाल्याबद्दल मान्यवरांच्या हस्ते शाल व श्रीफळ देऊन त्यांचा भावपूर्ण सत्कार करण्यात आला. यावेळी उपस्थित सर्व शिक्षक सहकाऱ्यांनी त्यांना भावी वाटचालीस शुभेच्छा दिल्या.
कार्यक्रमाचे नेटके सूत्रसंचालन व आभार प्रदर्शन प्रिया करमळकर आणि सुधीर गावडे यांनी केले. या परिषदेला इन्सुली केंद्रातील सर्व शिक्षक-शिक्षिका मोठ्या संख्येने उपस्थित होत्या. शैक्षणिक वर्षाच्या सुरुवातीलाच झालेल्या या पहिल्या परिषदेमुळे उपस्थित सर्व शिक्षकांमध्ये एक नवा उत्साह आणि ऊर्जा निर्माण झाल्याचे दिसून आले.
