हिंदुत्ववादी कार्यकर्त्यांच्या सतर्कतेमुळे प्रकार उघड; पडताळणीनंतर परतीची प्रक्रिया सुरू
सावंतवाडी,दि.२४: सावंतवाडी शहरातील भटवाडी-काजरकोंड परिसरात मुस्लिम वेष धारण करून नागरिकांकडे मदतीच्या नावाखाली पैशांची मागणी करणाऱ्या तीन काश्मिरी नागरिकांना सावंतवाडी पोलिसांनी ताब्यात घेतले. स्थानिक हिंदुत्ववादी संघटनेच्या कार्यकर्त्यांनी दाखविलेल्या सतर्कतेमुळे हा प्रकार उघडकीस आला असून, पोलिसांनी प्राथमिक चौकशी आणि पडताळणी केल्यानंतर संबंधितांना परत पाठविण्याची प्रक्रिया सुरू केली आहे.
मिळालेल्या माहितीनुसार, संशयास्पद हालचाली करत काही व्यक्ती नागरिकांकडे आर्थिक मदतीची मागणी करत असल्याची माहिती हिंदुत्ववादी कार्यकर्त्यांना मिळाली. त्यांनी तत्काळ याबाबत सावंतवाडी पोलिसांना माहिती दिली. त्यानंतर पोलिसांनी घटनास्थळी धाव घेत तिन्ही व्यक्तींना ताब्यात घेऊन पोलीस ठाण्यात आणले.
प्राथमिक चौकशीत हे तिघे जम्मू-काश्मीर राज्यातील कुपवाडा जिल्ह्यातील मणीगा गावचे रहिवासी असल्याचे निष्पन्न झाले. त्यांच्या ओळखीची खातरजमा करण्यासाठी सावंतवाडी पोलिसांनी संबंधित पोलीस ठाणे, बीट अंमलदार तसेच गावच्या सरपंचांशी थेट संपर्क साधून सविस्तर माहिती घेतली.
अधिकृत पडताळणीनंतर संबंधित व्यक्ती फिरस्ते स्वरूपात विविध ठिकाणी फिरत असल्याचे स्पष्ट झाल्याची माहिती पोलिसांकडून देण्यात आली. त्यानुसार त्यांना त्यांच्या मूळ गावी परत पाठविण्याची कार्यवाही सुरू करण्यात आली आहे.
दरम्यान, या घटनेमुळे परिसरात चर्चेला उधाण आले असून अशा प्रकारच्या संशयास्पद हालचालींकडे नागरिकांनी सतर्कतेने पाहावे, तसेच कोणतीही संशयास्पद बाब आढळल्यास तात्काळ पोलिसांशी संपर्क साधावा, असे आवाहन सावंतवाडी पोलिसांनी केले आहे.
