प्रशासनाच्या दुर्लक्षाविरोधात कुडाळ एमआयडीसी कार्यालयात निवेदन सादर; सखोल चौकशीची मागणी
दोडामार्ग,दि.०९: तालुक्यातील आडाळी एमआयडीसी परिसरात मोठ्या प्रमाणात अवैध खनिज उत्खनन सुरू असून प्रशासन याकडे पूर्णपणे दुर्लक्ष करत असल्याचा आरोप करत शिवसेना उद्धव बाळासाहेब ठाकरे पक्षाने तीव्र आंदोलनाचा इशारा दिला आहे. या बेकायदेशीर उत्खननाविरोधात सावंतवाडी विधानसभा प्रमुख रूपेश राऊळ आणि दोडामार्ग तालुकाप्रमुख संजय गवस यांच्या नेतृत्वाखाली शिवसेना पदाधिकाऱ्यांनी उपविभागीय अधिकारी तथा एमआयडीसी कार्यालय, कुडाळ यांना एक लेखी निवेदन सादर केले आहे.
या निवेदनात प्रशासकीय कारभारावर तीव्र संताप व्यक्त करण्यात आला आहे. दोडामार्ग तालुक्यात स्थानिक पातळीवर उद्योगधंद्यांना चालना मिळावी आणि रोजगाराच्या संधी निर्माण व्हाव्यात या उद्देशाने अनेक वर्षांपूर्वी आडाळी येथे महाराष्ट्र शासनाने एमआयडीसीची स्थापना केली होती. मात्र, आजतागायत या परिसरात अपेक्षित असलेले उद्योगधंदे उभे राहू शकलेले नाहीत. त्याऐवजी सध्या या भागात सपाटीकरणाच्या नावाखाली राजरोसपणे मोठ्या प्रमाणात खनिजयुक्त माती व इतर खनिजांचे उत्खनन करून त्याची बाहेर विक्री केली जात असल्याचा गंभीर आरोप शिवसेनेने केला आहे.
यासंदर्भात स्थानिक प्रशासनाशी अनेक वेळा संपर्क साधूनही आजवर कोणतीही ठोस कारवाई करण्यात आलेली नाही. उत्खननासाठी आवश्यक असणाऱ्या कायदेशीर परवानग्या किंवा कोणतीही अधिकृत माहिती उपलब्ध नसतानाही अत्यंत धाडसाने ही खनिज चोरी सुरू आहे. त्यामुळे या संपूर्ण प्रकरणाची सखोल चौकशी करून तात्काळ पंचनामा करण्यात यावा, तसेच संपूर्ण परिसराची तातडीने पाहणी करून या अवैध उत्खननावर त्वरित कायदेशीर कारवाई करावी, अशी मागणी निवेदनातून करण्यात आली आहे.
दरम्यान, या प्रकरणात आता ठाकरे शिवसेना आरपारची लढाई लढण्याच्या भूमिकेत आहे. आमदार महेश सावंत आणि माजी आमदार तथा जिल्हाप्रमुख वैभव नाईक यांच्या नेतृत्वाखाली शिवसेना पदाधिकारी व कार्यकर्ते लवकरच आडाळी एमआयडीसी परिसरात जाऊन प्रत्यक्ष पाहणी करणार आहेत. या पाहणी दौऱ्यानंतर अवैध उत्खननास छुपं संरक्षण देणाऱ्या संबंधित जबाबदार अधिकाऱ्यांविरोधात थेट आंदोलन छेडण्यात येईल, असा इशारा देण्यात आला आहे. तसेच, या आंदोलनादरम्यान कोणताही अनुचित प्रकार घडल्यास त्याची संपूर्ण जबाबदारी ही केवळ आणि केवळ प्रशासनाची राहील, असेही निवेदनात स्पष्ट करण्यात आले आहे.
हे निवेदन सादर करताना सावंतवाडी विधानसभा प्रमुख रूपेश राऊळ, दोडामार्ग तालुकाध्यक्ष संजय गवस, सावंतवाडी तालुकाध्यक्ष राजेश शेटकर, उपजिल्हाप्रमुख चंद्रकांत कासार, लक्ष्मण आयनोडकर, उप तालुका अध्यक्ष संदेश सावंत, विजय जाधव, प्रेमानंद नाईक, विनोद काजरेकर, प्रमोद सावंत, गोविंद केरकर, सुनील गावडे, गुरूनाथ नाईक, प्रशांत बुगडे, मंदार नाईक, विनोद ठाकूर, सोमनाथ गवस, भिवा गवस, संजीव पेडणेकर, गोकुळदास मोठे आणि विष्णू नाईक यांच्यासह उबाठा सेनेचे अनेक प्रमुख पदाधिकारी आणि कार्यकर्ते मोठ्या संख्येने उपस्थित होते.
