दोडामार्ग,दि.०२: महाराष्ट्र राज्य माध्यमिक व उच्च माध्यमिक परीक्षा मंडळामार्फत घेण्यात आलेल्या इयत्ता बारावीच्या परीक्षेचा निकाल जाहीर झाला असून, यात दोडामार्ग इंग्लिश स्कूल व ज्युनिअर कॉलेजच्या विद्यार्थ्यांनी दैदीप्यमान यश संपादन केले आहे. विशेष म्हणजे या महाविद्यालयाच्या वाणिज्य शाखेचा विद्यार्थी कु. संचित सुभाष परब याने ८७.३३% गुण मिळवून संपूर्ण दोडामार्ग तालुक्यातून सर्व शाखांमध्ये प्रथम क्रमांक पटकावण्याचा मान मिळवला आहे.
दोडामार्ग इंग्लिश स्कूलचा एकूण निकाल ९३% लागला असून परीक्षेसाठी प्रविष्ट झालेल्या १५५ विद्यार्थ्यांपैकी १४४ विद्यार्थी उत्तीर्ण झाले आहेत. शाखानिहाय निकालाचा आढावा घेतल्यास, विज्ञान शाखेचा निकाल ९६% लागला आहे. या शाखेत कु. अनया संतोष गवस ७५.३३% गुणांसह विद्यालयात प्रथम आली असून तिने विज्ञान शाखेत तालुक्यात द्वितीय क्रमांक मिळवला आहे. कु. अभिषेक कृष्णा तळणकर (७१%) याने विद्यालयात द्वितीय आणि तालुक्यात तृतीय क्रमांक पटकावला, तर कु. श्रेया तानाजी दळवी (६६.१७%) हिने विद्यालयात तृतीय क्रमांक मिळवला.
कला शाखेचा निकाल ८९% लागला असून कु. सिद्धेश श्रीधर सावंत याने ७७.१७% गुणांसह विद्यालयात प्रथम क्रमांक मिळवतानाच तालुक्यातही कला शाखेतून प्रथम येण्याचा बहुमान मिळवला. कु. सिद्धी संतोष गवस (६८.१७%) हिने तालुक्यात द्वितीय आणि कु. सेजल शिवानंद प्रभावळकर (६४.३३%) हिने तालुक्यात तृतीय क्रमांक मिळवून शाळेच्या यशात भर घातली.
वाणिज्य शाखेचा निकाल ९२% लागला असून संचित परब याने तालुक्यातून अव्वल ठरत शाळेचे नाव सुवर्ण अक्षरात कोरले आहे. याच शाखेतून कु. अतुल शिवराम मोर्लेकर ७४.८३% गुणांसह द्वितीय तर कु. अनुज शिवराम मोर्लेकर ६९% गुणांसह तृतीय क्रमांकाने उत्तीर्ण झाला आहे. या सर्व यशस्वी विद्यार्थ्यांचे संस्था अध्यक्ष व सिंधुदुर्ग जिल्हा परिषद सदस्य श्री. विक्रांत विकासभाई सावंत, उपाध्यक्ष डॉ. दिनेश नागवेकर, सचिव श्री. व्ही. बी. नाईक, खजिनदार श्री. सी. एल. नाईक, मुख्याध्यापक श्री. संजय पाटील तसेच सर्व शिक्षक, शिक्षकेतर कर्मचारी आणि पालकांनी अभिनंदन केले असून विद्यार्थ्यांच्या या यशामुळे दोडामार्ग परिसरातून त्यांचे कौतुक होत आहे.
