मालवण,दि.२४: तालुक्यातील सावरवाड-वराड येथे स्थापित करण्यात आलेल्या स्फटिक शिवलिंगाच्या समर्थनार्थ ग्रामस्थांनी एकजूट दाखवत जोरदार एल्गार पुकारला आहे. “सनातन संस्कृती हीच आमची भक्ती आणि आमच्या वाडीची अस्मिता असून, गावाचे नाव बदनाम करण्याचा कोणाचाही प्रयत्न सहन केला जाणार नाही,” असा ठाम इशारा ग्रामस्थांनी आयोजित सभेत दिला. सिंधुदुर्ग जिल्ह्यातील एकमेव आणि अद्वितीय मानल्या जाणाऱ्या या स्फटिक शिवलिंगामुळे गावाची धार्मिक ओळख अधिक दृढ होत असून, उच्चशिक्षित युवकांच्या पुढाकारातून हे दैविक आणि सांस्कृतिक कार्य सुरू असल्याचा सार्थ अभिमान वाडीवासीयांनी व्यक्त केला.
या महत्त्वपूर्ण सभेला व्यासपीठावर यशस्वी उद्योजक बाळा चिंदरकर, जयेंद्रनाथ परब, महेश वालावलकर, नारायण चिंदरकर, ॲड. प्रदीप मिठबावकर, नंदन केसरकर, अजिंक्य पाताडे यांसह गावातील प्रतिष्ठित नागरिक उपस्थित होते.
यावेळी बोलताना शिवसाधकांनी स्पष्ट केले की, गावातील ग्रामदैवत आणि येथील देवालये यांना प्रथम स्मरूनच ही शिवसाधना केली जाते, त्यामुळे बाहेरील व्यक्तींनी कोणताही गैरसमज पसरवू नये. युवा शिवसाधक समेश जाधव यांनी स्फटिक शिवलिंगाबाबत करण्यात येणाऱ्या अपप्रचाराचे पुराव्यानिशी खंडन केले, तर शिवसाधक चंद्रशेखर राणे यांनी या शिवलिंगाच्या स्थापनेपासूनचा प्रवास आणि त्यामागील धार्मिक महत्त्व सविस्तरपणे ग्रामस्थांसमोर मांडले.
उपस्थित ग्रामस्थांनी आपले मनोगत व्यक्त करताना सांगितले की, आमची वाडी, आमची संस्कृती आणि आमची सनातन परंपरा हीच आमची खरी अस्मिता आहे. रुद्रनाथ फाउंडेशनच्या माध्यमातून होत असलेले हे शिवकार्य युवा पिढीसाठी प्रेरणादायी ठरणार आहे. काही संधीसाधूंकडून होत असलेल्या अपप्रचाराबाबत ग्रामस्थांनी तीव्र नाराजी व्यक्त केली. उद्योजक बाळासाहेब चिंदरकर यांनी आपल्या गावाशी असलेले भावनिक नाते अधोरेखित करताना आवाहन केले की, गावातील अंतर्गत वाद आता संपुष्टात यावेत आणि सर्वांनी एकमेकांचा आदर राखत पुढे जावे. मात्र, गावाचा अपप्रचार आणि अपमान कोणत्याही परिस्थितीत खपवून घेतला जाणार नाही, असा इशाराही त्यांनी दिला.
या सभेमध्ये महेश वालावलकर, नंदन केसरकर, नारायण चिंदरकर, अजिंक्य पाताडे, ॲड. प्रदीप मिठबावकर तसेच अंजुषा पिल्लई यांनीही आपली मते मांडली. आगामी काळात हे स्फटिक शिवलिंग जगविख्यात होण्याची क्षमता राखून आहे, असा विश्वास व्यक्त करण्यात आला. कोकणच्या समृद्ध संस्कृतीचा जागतिक पातळीवर प्रचार-प्रसार करण्यासाठी आणि गावाची प्रतिष्ठा जपण्यासाठी सर्वांनी एकदिलाने प्रयत्न करावेत, असे आवाहन करत या सभेची सांगता करण्यात आली.
