नवयुवक कला क्रिडा मंडळाचे आयोजन ; जादूच्या प्रयोगाला उत्स्फूर्त प्रतिसाद..
सावंतवाडी, दि.२३: सोनुर्ली-पाक्याची वाडी येथील ‘नवयुवक कला क्रीडा मंडळ’ आयोजित ‘खेळ पैठणीचा’ आणि ‘मॅजिक शो’ या कार्यक्रमाला महिला व बालकांचा उत्स्फूर्त प्रतिसाद लाभला. बुद्धिमत्ता, चपळता आणि आत्मविश्वासाच्या जोरावर सौ. सुविधा हिराप यांनी मानाच्या पैठणीवर आपले नाव कोरले, तर सौ. दीक्षा नाईक यांनी द्वितीय आणि सौ. अक्षता साळगावकर यांनी तृतीय क्रमांक पटकावला.
.निवेदक राहुल कदम यांच्या बहारदार निवेदनाने रंगलेल्या या स्पर्धेत तब्बल ४७ महिलांनी सहभाग घेतला होता. उखाणे, अभिनय आणि विविध खेळांच्या माध्यमातून महिलांनी आपल्या सुप्त गुणांचे दर्शन घडवले. विशेषतः ‘अचानक मिळालेल्या विषयावर अभिनय’ करण्याच्या कठीण फेरीत अनेक महिलांनी आपल्या कौशल्याने उपस्थितांची वाहवा मिळवली. विजेत्यांना पैठणी देऊन सन्मानित करण्यात आले, तर सहभागी प्रत्येक महिलेला मंडळाच्या वतीने विशेष भेटवस्तू देऊन गौरविण्यात आले.
महिलांच्या कार्यक्रमानंतर जागतिक कीर्तीचे जादूगार वैभव कुमार यांचा मॅजिक शो पार पडला. तब्बल तीन तास चाललेल्या या कार्यक्रमात जादूगाराने विविध अवाक करणाऱ्या युक्त्या दाखवून बच्चेकंपनीसह मोठ्यांनाही खिळवून ठेवले. मुलांनी या जादूच्या प्रयोगांमध्ये प्रत्यक्ष सहभाग घेत धम्माल मस्ती केली.
ग्रामीण भागातील महिलांसाठी पाक्याची वाडी येथे अशा दर्जेदार कार्यक्रमाचे आयोजन केल्याबद्दल महिलांनी नवयुवक मंडळाचे आभार मानले आहेत. हा संपूर्ण सोहळा प्रश्न कोडे, हास्य-विनोद आणि उत्साहाच्या वातावरणात पार पडला.
