सावंतवाडी,दि.१३: शिरशिंगे राणेवाडी येथील श्री विघ्नेश्वर कला क्रीडा व सांस्कृतिक मंडळ, राणेवाडी ग्रामस्थ आणि महिला मंडळाच्या संयुक्त विद्यमाने शनिवार, दिनांक १४ मार्च २०२६ रोजी ‘राणेवाडी महोत्सव २०२६’ या भव्य सांस्कृतिक कार्यक्रमाचे आयोजन करण्यात आले आहे. या महोत्सवात दिवसभर विविध धार्मिक आणि मनोरंजनात्मक कार्यक्रमांची मेजवानी भाविकांना आणि ग्रामस्थांना मिळणार आहे.
महोत्सवाचा प्रारंभ सकाळी ८ वाजता रांगोळी प्रदर्शनाने होणार असून सकाळी ९ वाजता मोफत नेत्र तपासणी शिबिराचे आयोजन करण्यात आले आहे. त्यानंतर दुपारी १ वाजता महाप्रसादाचा कार्यक्रम संपन्न होईल. दुपारच्या सत्रात ३ वाजल्यापासून ग्रामस्थांसाठी मनोरंजनात्मक खेळांचे आयोजन करण्यात आले असून सायंकाळी ६ वाजता स्थानिक ग्रामस्थांचे भजन होणार आहे.
रात्रीच्या सत्रात भजनाची विशेष मेजवानी असून सायंकाळी ७ वाजता सुप्रसिद्ध भजनी बुवा विनय नांदोसकर यांचे सुश्राव्य भजन सादर होईल. महोत्सवाचा मुख्य आकर्षण असलेला पौराणिक दशावतार नाट्य प्रयोग रात्री ९:३० वाजता सुरू होईल. स्वतः मालक बाबी कलिंगण प्रस्तुत आणि ‘कलेश्वर दशावतार नाट्य मंडळ, नेरूर (ता. कुडाळ)’ यांचा हा महान पौराणिक प्रयोग शिरशिंगे राणेवाडी येथील श्री देव क्षेत्रपाल पिंपळेश्वर कलामंच येथे पार पडणार आहे. या सर्व कार्यक्रमांचा लाभ घेण्याचे आवाहन आयोजक विघ्नेश्वर मंडळ व ग्रामस्थांनी केले आहे.
