सावंतवाडी,दि.०५: तळवडे जिल्हा परिषद मतदारसंघाला विकासाच्या बाबतीत प्रथम क्रमांकावर नेण्याचा निर्धार मी केला असून, आतापर्यंत हाती घेतलेली सर्व विकासकामे पूर्णत्वास नेणारच, असा ठाम विश्वास महायुतीचे उमेदवार संदीप गावडे यांनी व्यक्त केला. मतदारसंघाचा विकास, प्रगती आणि सर्वांगीण उभारणी हेच माझे स्पष्ट व्हिजन असल्याने जनतेचा भरभरून पाठिंबा मला मिळत आहे, असेही त्यांनी नमूद केले.
प्रचारादरम्यान बोलताना गावडे यांनी विरोधकांवर जोरदार टीका केली. ते म्हणाले की, माझे विरोधक केवळ एकाच मुद्द्यावर अडकून वारंवार मतदारांमध्ये संभ्रम निर्माण करण्याचा प्रयत्न करत आहेत, परंतु त्यांच्या या वागण्यामुळे उलट माझा विजय अधिक सोपा होत आहे. महायुतीतील सर्व वरिष्ठ नेत्यांचे भक्कम आशीर्वाद माझ्या पाठीशी असून, तळवडे मतदारसंघात महायुतीचा विजय निश्चित असल्याचे त्यांनी ठामपणे सांगितले.
यावेळी सूरज परब यांनीही महायुतीची ताकद स्पष्ट केली. महायुती आज पूर्णपणे अभेद्य असून विरोधकांनी कितीही डावपेच आखले तरी येथे महायुतीचेच उमेदवार विजयी होतील, असा विश्वास त्यांनी व्यक्त केला. तसेच येत्या ९ फेब्रुवारीला विजयाचा गुलाल आम्हीच उधळणार, असा दावाही परब यांनी यावेळी केला.
