सावंतवाडी,दि.२९: सावंतवाडी तालुक्यातील जिल्हा परिषद व पंचायत समिती निवडणुकांचे रणशिंग फुंकले गेले असून, प्रचाराने आता अत्यंत निर्णायक टप्प्यात प्रवेश केला आहे. या निवडणुकीत भारतीय जनता पार्टी आणि शिवसेना (शिंदे गट) महायुतीने आपली सर्व ताकद पणाला लावली असून, माडखोल जिल्हा परिषद गटाच्या उमेदवार सौ. सुप्रिया रवींद्र मडगावकर यांच्या प्रचाराला आध्यात्मिक आणि संघटनात्मक बळ मिळाल्याने महायुतीचे पारडे जड होताना दिसत आहे.
प्रचाराच्या शुभारंभाला महायुतीच्या उमेदवारांनी ग्रामोदैवतेच्या आशीर्वादाने केला.
सांगेली येथील ग्रामदैवत श्री देव गिरजानाथ, सावरवाड येथील श्री देव गांगेश्वर आणि वेर्ले गावची ग्रामदैवत श्री देवी पावणाई यांच्या चरणी नतमस्तक होऊन उमेदवारांनी विजयासाठी आशीर्वाद घेतले. या भक्तीमय वातावरणात जिल्हा परिषद माडखोल गटाच्या उमेदवार सौ. सुप्रिया मडगावकर, पंचायत समिती कलंबिस्त गणाचे उमेदवार रमाकांत रावजी राऊळ तसेच माडखोल पंचायत समितीच्या उमेदवार सौ. अनिता अनिल राऊळ यांच्यासाठी भव्य प्रचार दौरा काढण्यात आला.
या दौऱ्या दरम्यान कार्यकर्त्यांमध्ये अभूतपूर्व उत्साह पाहायला मिळाला. “विकास, पारदर्शकता आणि लोकहिताचा कारभार” ही त्रिसूत्री घेऊन महायुती मतदारांच्या दारापर्यंत पोहोचत आहे. यावेळी भाजप आणि शिवसेना शिंदे गटाचे पदाधिकारी, स्थानिक नेते व ग्रामस्थ मोठ्या संख्येने उपस्थित होते. गावोगावी मिळणारा उत्स्फूर्त प्रतिसाद आणि कार्यकर्त्यांचा जोश पाहता, सुप्रिया मडगावकर यांच्यासह महायुतीचे सर्व उमेदवार प्रचंड मताधिक्याने विजयी होतील, असा विश्वास यावेळी व्यक्त करण्यात आला. ग्रामदैवतांचा आशीर्वाद आणि भक्कम संघटनात्मक बांधणीच्या जोरावर महायुतीने निवडणुकीच्या रिंगणात मोठी आघाडी घेतल्याचे चित्र सध्या सावंतवाडीत दिसत आहे.
