पोलीस व नागरिकांच्या सहकार्यातून कायदा-सुव्यवस्था अधिक मजबूत करणार – नूतन पोलीस निरीक्षक राजेंद्र मगदूम
सावंतवाडी,दि.१३: सावंतवाडी पोलीस ठाण्याचे नूतन पोलीस निरीक्षक राजेंद्र मगदूम यांची माहिती अधिकार पदाधिकारी सुशिल चौगुले यांनी सदिच्छा भेट घेऊन पुष्पगुच्छ देऊन स्वागत केले. या भेटीदरम्यान सावंतवाडी शहर व तालुक्यात कायदा आणि सुव्यवस्था अधिक सक्षम राखण्यासाठी पोलीस प्रशासन व नागरिकांमध्ये प्रभावी समन्वय निर्माण करण्यावर सविस्तर चर्चा झाली.
आगामी गणेशोत्सवाच्या पार्श्वभूमीवर नागरिकांना सुरक्षित व सुरळीत सेवा मिळावी आणि उत्सव काळात कोणताही अनुचित प्रकार घडू नये यासाठी पूर्वतयारीचा आढावा घेण्यात आला. सण-उत्सवांच्या काळात गर्दीचे नियोजन, वाहतूक व्यवस्था आणि सुरक्षितता राखण्यासाठी पोलीस प्रशासनासोबत नागरिकांचा सक्रिय सहभाग आवश्यक असल्याचे यावेळी अधोरेखित करण्यात आले.
नूतन पोलीस निरीक्षक राजेंद्र मगदूम यांनी सावंतवाडीतील कायदा व सुव्यवस्था अधिक प्रभावीपणे राखण्यासाठी पोलीस प्रशासन कटिबद्ध असून यासाठी नागरिकांकडून योग्य ते सहकार्य मिळेल,अशी अपेक्षा व्यक्त केली. या भेटीतून ‘सुरक्षित सावंतवाडीसाठी पोलीस आणि नागरिकांची भागीदारी’ हा सकारात्मक संदेश देण्यात आला.
