सुदैवाने जीवितहानी टळली; वीज पुरवठा खंडित, झाड बाजूला करण्याचे काम युद्धपातळीवर सुरू
सावंतवाडी,दि.०६: सावंतवाडी तालुक्यातील धवडकी येथील दत्तमंदिर शेजारी असलेल्या तुकाराम पानवळकर यांच्या लोहार शाळेवर आज, सोमवारी सायंकाळी पाच वाजण्याच्या सुमारास ‘न्हीवाचे’ (निव्हाचे) झाड कोसळल्याची घटना घडली. झाड पडल्यामुळे शाळेचे छप्पर कोसळून मोठे आर्थिक नुकसान झाले आहे. मात्र, दुर्घटना घडली तेव्हा लोहार शाळेमध्ये कोणीही काम करत नसल्याने सुदैवाने कोणतीही जीवितहानी झाली नाही.
ही इमारत वेंगुर्ला-बेळगाव राज्य महामार्गाला अगदी लागून असल्याने झाड कोसळताच रस्त्यावरील वाहतूक पूर्णपणे ठप्प झाली. महामार्गावर दोन्ही बाजूंनी वाहनांच्या लांबच लांब रांगा लागल्या असून, परिसरात मोठी वाहतूक कोंडी निर्माण झाली आहे. धवडकी येथील सामाजिक कार्यकर्ते अमित राऊळ यांनी या संपूर्ण घटनेची माहिती दिली.
दरम्यान, हे अवाढव्य झाड रस्त्याशेजारील विजेच्या तारांवर कोसळल्याने महामार्गावरील विजेच्या तारा तुटून पडल्या आणि परिसराचा वीज पुरवठा तात्काळ खंडित झाला. सुदैवाने तारा अंगावर पडून कोणताही मोठा अनर्थ घडला नाही. घटनेचे गांभीर्य ओळखून सामाजिक कार्यकर्ते अमित राऊळ यांनी महावितरण कंपनीच्या कर्मचाऱ्यांना फोनवरून तातडीने याबाबीची कल्पना दिली. माहिती मिळताच वीज वितरण कंपनीच्या कर्मचाऱ्यांनी घटनास्थळी धाव घेतली. त्यांनी सर्वप्रथम परिसराचा वीज पुरवठा सुरक्षिततेच्या कारणास्तव पूर्णपणे बंद केला. सध्या वीज कर्मचारी आणि स्थानिक नागरिकांच्या सहकार्याने रस्त्यावरील झाड आणि फांद्या बाजूला करण्याचे काम युद्धपातळीवर सुरू असून, वाहतूक पूर्ववत करण्याचे प्रयत्न केले जात आहेत.
