‘सबका साथ, सबका विकास’च्या नाऱ्याने परिसर दुमदुमला; भाजप पदाधिकारी आणि नागरिकांची मोठी उपस्थिती
सावंतवाडी,दि.२८: देशाचे पंतप्रधान मा. श्री. नरेंद्रजी मोदी यांच्या अत्यंत लोकप्रिय आणि मार्गदर्शक अशा ‘मन की बात’ कार्यक्रमाचे आज सावंतवाडी येथे सामूहिक श्रवण करण्यात आले. सावंतवाडी येथील भाजपा जनसंपर्क कार्यालयात आयोजित करण्यात आलेल्या या कार्यक्रमाला भारतीय जनता पक्षाचे पदाधिकारी, कार्यकर्ते आणि स्थानिक नागरिकांनी मोठ्या संख्येने हजेरी लावली होती. संपूर्ण परिसरात अत्यंत उत्साहपूर्ण आणि राष्ट्रभक्तीमय वातावरण पाहायला मिळाले.
या कार्यक्रमाच्या माध्यमातून पंतप्रधानांनी देशाच्या प्रगतीचा संकल्प आणि ‘विकसित भारत’चे स्वप्न देशवासियांसमोर मांडले. समाजातील सकारात्मक बदल, लोकसहभाग आणि राष्ट्रहिताच्या विविध महत्त्वपूर्ण विषयांवर त्यांनी केलेले मार्गदर्शन उपस्थित सर्वच कार्यकर्त्यांसाठी आणि नागरिकांसाठी कमालीचे प्रेरणादायी आणि ऊर्जा देणारे ठरले. पंतप्रधानांच्या या विचारांनी उपस्थितांमध्ये नवा उत्साह भरला.
या सामूहिक श्रवणानंतर उपस्थित सर्वांनी देशहिताच्या आणि लोककल्याणाच्या कार्यात आपला सक्रिय सहभाग नोंदवण्याचा दृढ निर्धार व्यक्त केला. तसेच पंतप्रधानांचा मूळ मंत्र असलेल्या ‘सबका साथ, सबका विकास, सबका विश्वास आणि सबका प्रयास’ या विचाराला पुन्हा एकदा जाहीर पाठिंबा दर्शवत, देशाच्या प्रगतीमध्ये खारीचा वाटा उचलण्याची शपथ सर्वांनी घेतली. या यशस्वी आयोजनाबद्दल भारतीय जनता पार्टी सावंतवाडीच्या वतीने उपस्थितांचे आभार मानण्यात आले.
यावेळी भाजपा युवा नेते विशाल परब, उपनगराध्यक्ष अनिल निरवडेकर , माजी नगरसेवक विलास जाधव, बंटी जामदार आदी भाजपा पदाधिकारी व कार्यकर्ते मोठ्या संख्येने उपस्थित होते.
