सातासमुद्रापार जाऊनही मातृभूमीशी नाळ कायम; ८४ विद्यार्थ्यांना मिळाला पावसाळ्यात मोठा दिलासा
सावंतवाडी,दि.२७ : पावसाळ्याच्या पार्श्वभूमीवर, ग्रामीण भागातील विद्यार्थ्यांना शाळेत ये-जा करताना येणाऱ्या अडचणी लक्षात घेऊन, अमेरिकेत स्थित असलेले निगुडे गावचे माजी विद्यार्थी श्री. सागर निगुडकर यांनी आपली सामाजिक बांधिलकी जपली आहे. त्यांच्या पुढाकारातून जिल्हा परिषद पूर्ण प्राथमिक शाळा, निगुडे नंबर १, २ आणि तिन्ही अंगणवाड्यांमधील सर्व विद्यार्थ्यांना मोफत छत्र्या आणि खाऊचे वाटप करण्यात आले.
या कार्यक्रमादरम्यान अमेरिकेतून उपस्थित राहिलेले माजी विद्यार्थी सागर निगुडकर यांनी विद्यार्थ्यांशी संवाद साधताना अत्यंत भावनिक विचार मांडले. ते म्हणाले की, मी जरी आज अमेरिकेत स्थित असलो, तरी याच शाळेत शिकून मोठा झालो आहे. अंगणवाडी ते सातवीपर्यंतचे माझे बालपण याच गावात गेले असून, आपण ज्या शाळेत शिकलो तिचे काहीतरी देणे लागतो या भावनेतून मी हा छोटासा उपक्रम केला आहे आणि तो पुढेही सुरू राहील. विद्यार्थ्यांनी मन लावून शिकावे, मोठे व्हावे आणि गावाचे नाव उज्ज्वल करावे, असे आवाहन त्यांनी यावेळी केले.
या उपक्रमाचे कौतुक करताना कार्यक्रमाचे प्रमुख पाहुणे इन्सुली पंचायत समिती सदस्य सदाशिव राणे यांनी निगुडकर यांच्या आपुलकीचे आभार मानले. या उपक्रमामुळे विद्यार्थ्यांना पावसापासून संरक्षण मिळणार असून माजी विद्यार्थ्यांनी आपल्या शाळेबद्दल जपलेली आपुलकी आणि सामाजिक बांधिलकी पुन्हा अधोरेखित झाली असल्याचे ते म्हणाले. तसेच, शाळेच्या नादुरुस्त वर्गखोल्यांची पाहणी करून, पंचायत समिती स्तरावरून शाळेला आवश्यक असणारा निधी मिळवून देण्यासाठी सर्वतोपरी पाठपुरावा करण्याचा विश्वास त्यांनी यावेळी उपस्थितांना दिला. माजी सरपंच समीर गावडे यांनीही सागर निगुडकर यांचे कौतुक करत, लहानपणी आपल्याला सातासमुद्रापार जाण्याचे स्वप्न दाखवले जायचे, परंतु आज आपल्यातीलच एक माजी विद्यार्थी सातासमुद्रापार जाऊनही आपल्या शाळेला विसरला नाही, ही अभिमानास्पद गोष्ट असल्याचे सांगितले.
या स्तुत्य उपक्रमांतर्गत निगुडे गावातील जि. प. प्राथमिक शाळा क्र. १ व २, तसेच तिन्ही अंगणवाड्यांमधील एकूण ८४ विद्यार्थ्यांना छत्र्या आणि खाऊचे वाटप करण्यात आले. या कार्यक्रमाचे उत्कृष्ट सूत्रसंचालन शिक्षक श्री. सावंत यांनी केले. यावेळी व्यासपीठावर निगुडेचे सरपंच लक्ष्मण निगुडकर, माजी सरपंच समीर गावडे, माजी उपसरपंच गुरुदास गवंडे, शाळा व्यवस्थापन समितीच्या उपाध्यक्षा निधी गावडे, सदस्या संजना केसरकर, संतोष राणे, उद्योजक नारायण राणे, शाळेचे मुख्याध्यापक नारायण नाईक, शिक्षक कांदे, शिक्षिका देसाई, तसेच माजी विद्यार्थिनी गंधाली निगुडकर आणि पल्लवी निगुडकर आदी मान्यवर, ग्रामस्थ व पालक मोठ्या संख्येने उपस्थित होते. सागर निगुडकर यांच्या या उपक्रमाबद्दल मुख्याध्यापक, शिक्षकवृंद आणि ग्रामस्थांनी त्यांचे मनापासून आभार मानले.
