विक्रांत सावंत यांची संकल्पना: ५० विद्यार्थ्यांनी घेतले लाठीकाठी अन् तलवारबाजीचे धडे
दोडामार्ग,दि.२८: शालेय वयातच विद्यार्थ्यांमध्ये शौर्याची परंपरा रुजावी आणि त्यांना ऐतिहासिक युद्धकलांची ओळख व्हावी, या उद्देशाने दोडामार्ग इंग्लिश स्कूल व ज्युनियर कॉलेजच्या प्रांगणात आयोजित पाच दिवसीय शिवकालीन मर्दानी खेळ प्रशिक्षण शिबिर नुकतेच उत्साहात संपन्न झाले. संस्थेचे अध्यक्ष विक्रांत विकासभाई सावंत यांच्या संकल्पनेतून आणि ‘ शंभो छत्रपती मर्दानी आखाडा, वंदूर-कोल्हापूर’ यांच्या मार्गदर्शनाखाली हे विशेष शिबिर पार पडले.
दिनांक २४ एप्रिल ते २८ एप्रिल या कालावधीत चाललेल्या या शिबिरात दोडामार्ग इंग्लिश स्कूलसह तालुक्यातील इतर शाळांमधील एकूण ५० विद्यार्थ्यांनी सहभाग नोंदवला होता. या पाच दिवसांच्या कालावधीत कोल्हापूर येथील निष्णात प्रशिक्षकांकडून विद्यार्थ्यांना लाठीकाठी, तलवारबाजी आणि स्वसंरक्षणाचे (Self Defense) शास्त्रोक्त व परिपूर्ण प्रशिक्षण देण्यात आले. शारीरिक कौशल्यासोबतच विद्यार्थ्यांमध्ये शिस्त आणि धाडस निर्माण व्हावे, यासाठी या प्रशिक्षणावर भर देण्यात आला होता.
विद्यार्थ्यांच्या आरोग्याची आणि उर्जेची काळजी घेत, शिबिरादरम्यान त्यांना पूरक आहाराचेही वाटप करण्यात आले. यासाठी संस्थेचे अध्यक्ष विक्रांत सावंत, सामाजिक कार्यकर्ते गणेश गावडे सर, पालक गणेश ठाकूर, सोमनाथ नाईक, धाकू वरक आणि मुख्याध्यापक संजय पाटील यांचे मोलाचे सहकार्य लाभले. या संपूर्ण शिबिराचा आर्थिक भार अध्यक्ष विक्रांत सावंत यांनी उचलून सामाजिक आणि शैक्षणिक बांधिलकी जपली.
कार्यक्रमाच्या समारोप प्रसंगी पालक सोमनाथ नाईक यांनी उपस्थित राहून प्रशिक्षकांचे आभार मानले. यावेळी त्यांना शाल, श्रीफळ आणि पेन देऊन सन्मानित करण्यात आले. या शिबिरामुळे विद्यार्थ्यांमध्ये नवा उत्साह संचारला असून, पालकांनीही या उपक्रमाचे मोठ्या प्रमाणावर कौतुक केले आहे.
