सावंतवाडी: आंतरराष्ट्रीय मानवाधिकार वेल्फेअर असोसिएशन सिंधुदुर्गच्या वतीने महिलांचा गौरव
सावंतवाडी, दि.१०: महिलांच्या जीवनात आणि समाजात जर खऱ्या अर्थाने परिवर्तन घडवून आणायचे असेल, तर स्वतः महिलांनी आता आत्मविश्वासाने पुढाकार घेणे ही काळाची गरज आहे, असे प्रतिपादन आंतरराष्ट्रीय मानवाधिकार वेल्फेअर असोसिएशनच्या सिंधुदुर्ग जिल्हाध्यक्षा सौ. मानसी परब यांनी केले. जागतिक महिला दिनानिमित्त सावंतवाडी येथील हिंदुस्तान पॉलिमर उद्योम नगर येथे आयोजित करण्यात आलेल्या महिला सन्मान सोहळ्यात त्या बोलत होत्या.
या कार्यक्रमाला हिंदुस्तान पॉलिमर कंपनीचे पार्टनर टी. के. मुदालीअर, संघटनेचे जिल्हाध्यक्ष मिलिंद धुरी, उपाध्यक्ष आनंद कांडरकर, सरचिटणीस आर. के. सावंत, सदस्या कु. सिद्धी पारकर, रेवती वालावलकर, श्रीमती वेंगुर्लेकर आणि रणजित जाधव आदी मान्यवर उपस्थित होते.
याप्रसंगी मार्गदर्शन करताना सरचिटणीस आर. के. सावंत म्हणाले की, महिला दिन हा केवळ एका दिवसापुरता मर्यादित नसून तो महिलांच्या हक्क, सन्मान आणि सक्षमीकरणाचा संदेश देणारा दिवस आहे. आजच्या काळात प्रत्येक क्षेत्रात महिलांचा सहभाग आणि त्यांचे योगदान अत्यंत महत्त्वाचे ठरत आहे. कार्यक्रमात सन्मानित करण्यात आलेल्या कु. भक्ती मठकर यांनी आपल्या सत्काराला उत्तर देताना सांगितले की, हा पुरस्कार केवळ माझा एकटीचा नसून सर्वांच्या पाठिंब्यामुळे मला हा सन्मान मिळाला आहे.
या संपूर्ण कार्यक्रमाचे सूत्रसंचालन आनंद कांडरकर यांनी केले, तर उपस्थितांचे आभार रणजित जाधव यांनी मानले. या सोहळ्याच्या माध्यमातून महिला शक्तीचा जागर करत विविध क्षेत्रांतील महिलांच्या कार्याचा गौरव करण्यात आला.
