मोरगाव शाळेत ‘इतिहासाची साधने’ प्रदर्शनात विद्यार्थ्यांचा मोठा सहभाग
दोडामार्ग,दि.१२: येथील जिल्हा परिषद पूर्ण प्राथमिक शाळा मोरगाव नंबर १ मध्ये विद्यार्थ्यांसाठी ऐतिहासिक साधनांचे विशेष प्रदर्शन आयोजित करण्यात आले होते. दुर्ग मावळा प्रतिष्ठान, दुर्ग रक्षक प्रतिष्ठान रेडी आणि नैसर्गिक पर्यावरण संवर्धन व मानवता विकास संस्था भारत यांच्या संयुक्त विद्यमाने भरवण्यात आलेल्या या प्रदर्शनाला मुलांचा आणि पालकांचा उत्स्फूर्त प्रतिसाद लाभला. या प्रदर्शनाचे मुख्य आकर्षण म्हणजे शिवकालीन शस्त्रास्त्रे, दुर्मिळ नाणी, ऐतिहासिक पुस्तके आणि छायाचित्रांची केलेली आकर्षक मांडणी होय. इयत्ता पहिली ते सातवीच्या विद्यार्थ्यांनी ही विविध प्रकारची शस्त्रे केवळ पाहिलीच नाहीत, तर ती प्रत्यक्ष हाताळून त्याबद्दलची सविस्तर माहिती अत्यंत कुतूहलाने जाणून घेतली.
याप्रसंगी ज्ञानेश्वर राणे आणि त्यांचे सहकारी आबा चिपकर यांनी छत्रपती शिवाजी महाराजांचा गौरवशाली इतिहास विविध प्रसंगांतून मुलांसमोर जिवंत केला. सिंधुदुर्ग आणि विजयदुर्ग किल्ल्यावरील महाराजांच्या अविस्मरणीय आठवणी तसेच तेथील मौल्यवान वस्तूंचे महत्त्व यावेळी विद्यार्थ्यांना विशद करण्यात आले. अंगणवाडी ताई हेमा नाईक यांच्या संकल्पनेतून राबवण्यात आलेल्या या प्रदर्शनास मोरगाव अंगणवाडीचे छोटे विद्यार्थी व पालकांनीही आवर्जून भेट दिली. या उपक्रमाच्या यशस्वी आयोजनासाठी मुख्याध्यापिका भाग्यश्री कुबल, शिक्षक ज्ञानेश्वर सावंत, संतोष गवस, स्वाती पाटील, अंगणवाडी मदतनीस सुप्रिया कदम यांच्यासह अनेक पालक व ग्रामस्थ उपस्थित होते. या प्रदर्शनामुळे शालेय विद्यार्थ्यांमध्ये आपल्या गौरवशाली इतिहासाबाबत नवी ओढ आणि अभिमान निर्माण झाल्याचे पाहायला मिळाले.
