सावंतवाडी, दि.०१: सावंतवाडी उपजिल्हा रुग्णालयातील वैद्यकीय अधिकारी डॉ. पांडुरंग वज्राटकर हे प्रदीर्घ सेवेनंतर शासकीय नियमानुसार निवृत्त झाले असून, त्यांच्या निरोप समारंभाप्रसंगी सावंतवाडी नगर परिषदेचे प्रभारी नगराध्यक्ष ॲड. अनिल निरवडेकर यांनी त्यांच्या कार्याचा गौरव केला. डॉ. वज्राटकर यांनी केलेली रुग्णसेवा ही खऱ्या अर्थाने ईश्वरसेवा असल्याचे नमूद करत, त्यांच्या निवृत्तीने रुग्णालयात निर्माण होणारी पोकळी भरून काढण्यासाठी व त्यांच्या दांडग्या अनुभवाचा लाभ पुढील दोन वर्षे सावंतवाडीलाच मिळावा, यासाठी विशेष प्रयत्न करणार असल्याचे निरवडेकर यांनी यावेळी स्पष्ट केले.
उपजिल्हा रुग्णालयात आयोजित करण्यात आलेल्या या भावूक निरोप समारंभाला वैद्यकीय अधीक्षक डॉ. ज्ञानेश्वर ऐवळे, सौ. मोहिनी वज्राटकर, डॉ. अनिकेत वज्राटकर, तालुका आरोग्य अधिकारी डॉ. कर्तरकर, माजी जिल्हा परिषद अध्यक्ष काका कुडाळकर, निवृत्त वैद्यकीय अधीक्षक डॉ. उत्तम पाटील यांच्यासह प्रफुल्ल वालावलकर, राजू मसुरकर, भास्कर केरवडेकर आणि वैद्यकीय क्षेत्रातील अनेक मान्यवर उपस्थित होते. कार्यक्रमाचे प्रास्ताविक श्री. सोन्सुरकर यांनी केले, तर अनेक सहकाऱ्यांनी डॉ. वज्राटकर यांच्यासोबतच्या आठवणींना उजाळा दिला.
यावेळी बोलताना डॉ. अमोल पावसकर यांनी डॉ. वज्राटकर यांच्या व्यक्तिमत्त्वाचे पैलू उलगडले. डॉ. वज्राटकर यांचा ज्ञानेश्वरीचा गाढा अभ्यास आणि रुग्णांशी संवाद साधण्याची त्यांची मृदू व प्रभावी शैली यामुळे ते रुग्णांमध्ये अत्यंत लोकप्रिय होते, असे त्यांनी सांगितले. ॲड. निरवडेकर यांनी डॉ. वज्राटकर यांना रुग्णसेवेचे ‘आदर्श मॉडेल’ संबोधले. डॉक्टर आणि रुग्ण यांच्यात संवादकौशल्य कसे असावे, याचा वस्तुपाठच त्यांनी आपल्या कारकिर्दीतून घालून दिला आहे. सामाजिक कार्यकर्त्यांशी असलेले त्यांचे जिव्हाळ्याचे नाते रुग्णसेवेला अधिक बळकटी देणारे ठरले, असेही निरवडेकर म्हणाले.
याच प्रसंगी रवी जाधव यांनी उपजिल्हा रुग्णालयात फिजिशियनची असलेली नितांत गरज अधोरेखित केली. डॉ. वज्राटकर यांनी निवृत्तीनंतरही आपली आधुनिक उपचारपद्धती आणि सेवा सुरू ठेवून गोरगरीब रुग्णांना आधार द्यावा, अशी अपेक्षा त्यांनी व्यक्त केली. उपस्थित सर्व मान्यवरांनी डॉ. वज्राटकर यांना त्यांच्या पुढील सुखमय आयुष्यासाठी आणि कौटुंबिक जीवनासाठी शुभेच्छा दिल्या. या सोहळ्याला रुग्णालयातील डॉक्टर्स, परिचारिका आणि कर्मचारी वर्ग मोठ्या संख्येने उपस्थित होता, ज्यांनी आपल्या लाडक्या ‘आरोग्यदूता’ला साश्रू नयनांनी निरोप दिला.
