सावंतवाडी,दि.०७: तळवडे मतदारसंघात आज सकाळपासूनच मतदान केंद्रांवर तरुणांचा प्रचंड उत्साह पाहायला मिळत असून, या उत्स्फूर्त सहभागामुळे महायुतीचे उमेदवार संदीप गावडे यांचा मोठा आणि निर्णायक विजय निश्चित असल्याचा ठाम दावा भाजपा युवा नेते विशाल परब यांनी केला आहे. मतदारसंघातील विविध मतदान केंद्रांच्या दौऱ्यादरम्यान त्यांनी मतदानाचा आढावा घेतला आणि पत्रकारांशी संवाद साधला.
यावेळी बोलताना विशाल परब म्हणाले की, वरिष्ठ नेत्यांचे अचूक नियोजन, विकासाचा स्पष्ट व्हिजन आणि त्याला मिळालेली तरुणांची मोठी ताकद यामुळे महायुतीचे सर्व उमेदवार विजयी होतील, यात कोणतीही शंका नाही. मतदारांमध्ये असलेला उत्साह आणि विकासाला मिळणारा पाठिंबा पाहता विजयाचे चित्र स्पष्ट असल्याचे त्यांनी नमूद केले.
या दौऱ्यात महायुतीचे उमेदवार संदीप गावडे, माजी पंचायत समिती सभापती पंकज पेडणेकर यांच्यासह अनेक पदाधिकारी व कार्यकर्ते मोठ्या संख्येने उपस्थित होते. संपूर्ण मतदारसंघात सध्या उत्साहाचं वातावरण असून, विजयाचा आत्मविश्वास कार्यकर्त्यांच्या चेहऱ्यावर स्पष्टपणे दिसून येत आहे. तरुणांच्या वाढत्या सहभागामुळे या निवडणुकीत संदीप गावडे मुसंडी मारणार असल्याचे चित्र सध्या तळवडे मतदारसंघात दिसत आहे.
