सावंतवाडी, दि.३१: तालुक्यातील माजगाव पंचायत समिती निवडणुकीत राजकीय वातावरण चांगलेच तापले असून, अपक्ष उमेदवार आणि सामाजिक कार्यकर्ते जितेंद्र गावकर यांनी प्रचारात मोठी आघाडी घेतल्याचे चित्र दिसत आहे. पारंपरिक प्रचाराला फाटा देत त्यांनी राबवलेल्या ‘डोअर-टू-डोअर’ मोहिमेमुळे राजकीय वर्तुळात त्यांच्या नावाची जोरदार चर्चा सुरू झाली आहे.
जितेंद्र ऊर्फ जीतू गावकर यांनी प्रत्येक वाडी-वस्ती आणि घराघरात जाऊन मतदारांशी वैयक्तिक संवाद साधण्यावर भर दिला आहे. तिकीट वाटपात झालेला अन्याय आणि स्थानिक प्रश्न यावर ते मतदारांशी थेट चर्चा करत आहेत. “अन्यायामुळे मतदारांमध्ये प्रचंड रोष असून, हा असंतोष मतपेटीतून नक्कीच व्यक्त होईल,” असा ठाम विश्वास गावकर यांनी यावेळी व्यक्त केला.
गावकर यांच्या प्रचाराला वेत्ये ग्रामपंचायतीचे सरपंच आणि लोकप्रिय सामाजिक कार्यकर्ते गुणाजी गावडे यांची ताकद मिळाली आहे. तरुणांमध्ये विशेष प्रभाव असलेल्या गावडे यांनी जितेंद्र गावकर यांना निवडून आणण्याचा निर्धार व्यक्त केला आहे. त्यांच्या सक्रिय सहभागामुळे गावकर यांच्या समर्थकांमध्ये उत्साहाचे वातावरण असून प्रचाराची धार अधिक तीव्र झाली आहे.
जितेंद्र गावकर यांनी आपली ‘ऑटो रिक्षा’ ही निशाणी मतदारांच्या मनावर ठसवण्यात मोठे यश मिळवले आहे. वैयक्तिक भेटीगाठीतून चिन्हाचा प्रचार करण्याची त्यांची पद्धत प्रभावी ठरत असून, चिन्हाची ओळख तळागाळापर्यंत पोहोचली आहे.
