सावंतवाडी,दि.०१ : जिल्हा परिषद पूर्ण प्राथमिक शाळा इन्सुली नंबर २ येथे ३१ ऑगस्ट रोजी इन्सुली केंद्राची तिसरी शिक्षण परिषद मोठ्या उत्साहात आणि अभ्यासपूर्ण वातावरणात पार पडली. कार्यक्रमाचा प्रारंभ विद्यादेवता सरस्वती माता यांच्या प्रतिमेचे पूजन आणि दीपप्रज्वलनाने झाला. याप्रसंगी शाळेच्या मुख्याध्यापिका श्रीमती नेहा सावंत यांनी केंद्रप्रमुख श्री. ठाकूर सर यांच्यासह उपस्थित सर्व शिक्षकांचे पुष्पगुच्छ देऊन यथोचित स्वागत केले.
परिषदेच्या पहिल्या सत्रात केंद्रप्रमुख श्री. ठाकूर सर यांनी शिष्यवृत्ती परीक्षेत घवघवीत यश मिळवून देणाऱ्या इन्सुली नंबर १, ३, ४ आणि ५ या शाळांतील शिक्षकांचे विशेष अभिनंदन केले. यानंतर जिल्हा शिक्षण व प्रशिक्षण संस्था (डाएट), सिंधुदुर्ग यांच्या सूचनेनुसार मागील महिन्यातील अभ्यासक्रम, शैक्षणिक अडचणी, त्यांवरील उपाय आणि शाळांमधील उत्कृष्ट उपक्रमांवर शिक्षकांमध्ये सखोल चर्चा झाली.
दुसऱ्या सत्रात विविध शैक्षणिक विषयांवर मार्गदर्शकांनी मार्गदर्शन केले. सौ. राधिका परब यांनी नवोपक्रमाची गरज आणि त्याची अंमलबजावणी यावर प्रकाश टाकला. सौ. धनदा शिंदे यांनी विद्यार्थ्यांचा पोर्टफोलिओ कसा तयार करावा व अद्ययावत ठेवावा याविषयी माहिती दिली. तर श्री. महेश सावंत यांनी इंग्रजी विषय सोपा आणि रंजक करण्यासाठीच्या विविध उपक्रमांची मांडणी केली.
या परिषदेत केंद्रातील सर्व शिक्षकांनी गटवार एकत्र येत इयत्ता २ री, ३ री, ४ थी आणि ६ वी साठी ‘कला, कार्यानुभव व शारीरिक शिक्षण’ (क.का.शा.) या विषयांचे सप्टेंबर व ऑक्टोबर महिन्यांचे नियोजन तयार करून त्याचे सादरीकरण केले. केंद्रप्रमुख श्री. ठाकूर सर यांनी उपस्थितांना प्रशासकीय बाबींविषयी आवश्यक सूचना दिल्या. संपूर्ण कार्यक्रमाचे सूत्रसंचालन व आभार प्रदर्शन सौ. रुपाली गवस यांनी केले. परिषदेला केंद्रातील शिक्षकांची मोठी उपस्थिती लाभली होती.
