खोट्या कागदपत्रांच्या आधारे परवाना दिल्याचा ग्रामस्थांचा आरोप; प्रांताधिकाऱ्यांना दिले निवेदन
सावंतवाडी,दि.०३: तालुक्यातील कलंबिस्त गावातील बिअर शॉपीचे दुकान आणि परिसरातील अवैध दारूधंदे तत्काळ बंद करण्यात यावेत, या प्रमुख मागणीसाठी गावातील शिष्टमंडळाने प्रांताधिकारी कार्यालयाला भेट देऊन निवेदन दिले. राज्य उत्पादन शुल्क विभागाने खोट्या कागदपत्रांच्या आधारे या बिअर शॉपीला परवानगी दिल्याने या संपूर्ण प्रकरणाची सखोल चौकशी करून दोषींवर कडक कारवाई करावी; अन्यथा येत्या १५ ऑगस्ट रोजी प्रांताधिकारी कार्यालयासमोर बेमुदत उपोषण छेडले जाईल, असा थेट इशारा कलंबिस्त ग्रामस्थांच्या शिष्टमंडळाने नायब तहसीलदार मनोज मुसळे आणि पोलीस प्रशासनाला दिला आहे.
यावेळी सामाजिक कार्यकर्ते बाबाजी पास्ते, माजी पंचायत समिती सदस्य प्रथमेश सावंत, अजित पवार राष्ट्रवादी काँग्रेस पक्षाचे युवा नेते विजय कदम, ज्येष्ठ ग्रामस्थ बाबू सावंत, निखिल सावंत, काशीराम म्हाडगुत आदी मान्यवर व ग्रामस्थ मोठ्या संख्येने उपस्थित होते. प्रांताधिकाऱ्यांना दिलेल्या निवेदनात ग्रामस्थांनी राज्य उत्पादन शुल्क विभाग आणि स्थानिक प्रशासनाच्या कारभारावर तीव्र संताप व्यक्त केला आहे.
कलंबिस्त ग्रामपंचायत हद्दीत बेकायदेशीरपणे बिअर शॉपी सुरू करण्यासाठी ग्रामपंचायतीचा खोटा ठराव वापरण्यात आल्याचा गंभीर आरोप निवेदनातून करण्यात आला आहे. गावात दारूबंदीबाबत यापूर्वीच ठराव मंजूर करण्यात आला असतानाही त्याकडे प्रशासनाने जाणीवपूर्वक दुर्लक्ष केले आहे. बिअर शॉपीच्या परवान्यासाठी राज्य उत्पादन शुल्क विभागाच्या अधिकाऱ्यांची दिशाभूल करण्यात आली. २५ जून रोजी या विषयावर बोलावलेल्या विशेष ग्रामसभेला केवळ १८ ग्रामस्थ उपस्थित होते. असे असतानाही उपस्थिती पत्रकावर खोट्या सह्या करून कुठलाही वैध ठराव मंजूर होण्यापूर्वीच ना-हरकत दाखला देण्यात आल्याचे कागदपत्रांवरून उघड होत आहे.
गावात बेकायदेशीर बिअर शॉपी सुरू झाल्याने आणि परिसरात अवैध दारू विक्री वाढल्यामुळे शाळकरी मुले तसेच तरुण वर्ग व्यसनाधीनतेकडे आकर्षित होत आहे. यामुळे गावात आणि लगतच्या पंचक्रोशीत दररोज वादविवाद, भांडणे व तंटे निर्माण होऊन शांतता धोक्यात आली आहे. त्यामुळे गावातील सामाजिक स्वास्थ्य टिकवण्यासाठी ही बेकायदेशीर बिअर शॉपी तसेच भागातील सर्व अवैध दारूधंदे कायमचे बंद करून कलंबिस्त आणि परिसर पूर्णपणे दारूमुक्त करावा, अशी आक्रमक मागणी ग्रामस्थांनी या निवेदनाद्वारे केली आहे.
