भारतीय जनता पार्टी शिरोडा युवा मोर्चाचा उपक्रम; भाजप कार्यालयात मान्यवरांच्या हस्ते वाटप सोहळा पडला पार पडला
शिरोडा, दि.०१: भारतीय जनता पार्टी सिंधुदुर्गच्या वतीने पंतप्रधान नरेंद्र मोदी यांच्या वाढदिवसानिमित्त आयोजित ‘सेवा पंधरवड्या’अंतर्गत आणि उपमुख्यमंत्री देवेंद्र फडणवीस यांच्या संकल्पनेतून ‘नमो नेत्र संजीवनी आरोग्य अभियान’ राबवण्यात आले होते. शासकीय नेत्रपेढी जिल्हा रुग्णालय ओरोस यांच्या सहकार्याने शिरोडा उपजिल्हा रुग्णालय व प्राथमिक आरोग्य केंद्र रेडी येथे मोफत नेत्रतपासणी शिबिर २९ सप्टेंबर २०२५ रोजी आयोजित करण्यात आले होते. या शिबिरात ज्या लाभार्थ्यांची नेत्रतपासणी झाली होती, त्यांचे चष्मे उपलब्ध झाल्यानंतर आज, शनिवार दिनांक १ ऑगस्ट २०२६ रोजी शिरोडा भाजप कार्यालयात भाजप शिरोडा युवा मोर्चाच्या वतीने मान्यवरांच्या हस्ते भव्य चष्मा वाटप कार्यक्रमाचे आयोजन करण्यात आले. या कार्यक्रमात एकूण ४८ लाभार्थ्यांना मोफत चष्म्यांचे वाटप करण्यात आले.
या कार्यक्रमाचे सूत्रसंचलन भाजप वेंगुर्ला तालुका उपाध्यक्ष लक्ष्मीकांत कर्पे यांनी केले. तर भाजप वेंगुर्ला तालुकाध्यक्ष विष्णू परब आणि जिल्हा उपाध्यक्ष प्रसन्ना देसाई यांनी उपस्थितांना संबोधित करत या उपक्रमाचे महत्त्व व संकल्पना स्पष्ट केली. समाजातील प्रत्येक घटकापर्यंत आरोग्य सेवा पोहोचावी याच उद्देशाने हे अभियान यशस्वीपणे राबवण्यात आल्याचे त्यांनी नमूद केले.
या कार्यक्रमाला प्रमुख मान्यवर म्हणून आसोली पंचायत समिती सदस्य संकेत धुरी, तालुका चिटणीस श्रीकृष्ण धानजी, वेंगुर्ला तालुका युवा मोर्चा सरचिटणीस राहुल गावडे, शिरोडा शक्ती केंद्र प्रमुख मयूरेश शिरोडकर, वेंगुर्ला तालुका युवा मोर्चा सदस्य सोमाकांत सावंत, आरवली शक्ती केंद्र प्रमुख महादेव नाईक, शिरोडा ग्रामपंचायतीचे माजी सरपंच मनोज उगवेकर, शिरोडा बूथ क्र. ८१ चे अध्यक्ष अभय बर्डे, शिरोडा बूथ क्र. ८५ चे अध्यक्ष चंद्रशेखर गोडकर उपस्थित होते. तसेच वेंगुर्ला तालुका महिला मोर्चाच्या पदाधिकारी गंधाली करमळकर, समृद्धी धानजी, स्नेहा गोडकर, पल्लवी नाईक, आसोली शक्ती केंद्र प्रमुख विजय बागकर, सागरतीर्थ भाजप पदाधिकारी बाळू वस्त, भाजप शिरोडा पदाधिकारी अनिल गावडे, तुषार म्हाकले आणि तालुका पदाधिकारी मारुती दोडशानट्टी यांची विशेष उपस्थिती लाभली. या संपूर्ण कार्यक्रमाचे आयोजन शिरोडा भाजप युवा नेते संतोष धानजी यांच्या पुढाकाराने व समन्वयाने करण्यात आले.
त्याचप्रमाणे सिंधुदुर्ग जिल्हा शिक्षण व आरोग्य सभापती प्रितेश राऊळ, भाजप वेंगुर्ला तालुका युवा मोर्चा अध्यक्ष प्रणव वायंगणकर, वेंगुर्ला नगरपरिषदेचे नगरसेवक प्रितम सावंत, भाजप पदाधिकारी तुषार साळगांवकर आणि शिरोडा माजी सरपंच विजय पडवळ यांनी या कार्यक्रमाला सदिच्छा भेट देऊन उपक्रमाचे कौतुक केले. या अभियानांतर्गत नेत्रतपासणी झालेल्या ४८ लाभार्थ्यांनी उपस्थित राहून या मोफत चष्मा वाटप योजनेचा लाभ घेतला.
