महिला सक्षमीकरणाचा स्तुत्य उपक्रम; रत्नागिरी आणि सिंधुदुर्ग जिल्ह्यातील २६ स्थानकांमधील १७ कर्तव्यदक्ष महिलांचा होणार सन्मान
सिंधुदुर्ग,दि .०२: गेली १४ वर्षे रत्नागिरी आणि सिंधुदुर्ग जिल्ह्यातील १०३ व्यक्ती व ५ संस्थांना विविध पुरस्कारांनी सन्मानित करणाऱ्या रत्नागिरीच्या ‘बोडस चॅरिटेबल ट्रस्ट’ने या वर्षी आपल्या वर्धापनदिनाचे औचित्य साधून एक स्तुत्य उपक्रम हाती घेतला आहे. कोकण रेल्वेच्या इतिहासात प्रथमच एखाद्या अशासकीय संस्थेमार्फत महिला सक्षमीकरणाचा भाग म्हणून कोकण रेल्वेच्या १७ महिला स्टेशन मास्तरांना ‘विशेष कार्यसन्मान पुरस्कार’ देऊन गौरविण्यात येणार आहे. सेवा काळात या महिला स्टेशन मास्तरांनी दाखवलेले कमालीचे प्रसंगावधान, चाकोरीबाहेर जाऊन केलेले प्रवाशांचे संरक्षण, चुकलेल्या व्यक्तींची त्यांच्या कुटुंबीयांशी घडवून आणलेली पुनर्भेट, रोखलेले संभाव्य आत्महत्येचे प्रसंग आणि कसोटीच्या क्षणी दाखवलेले धैर्य व तत्परता याबद्दल कृतज्ञता व्यक्त करण्यासाठी या पुरस्कारांचे आयोजन करण्यात आले आहे.
बोडस चॅरिटेबल ट्रस्टच्या कार्यक्षेत्रातील दिवाणखावटी ते मडूरे या २६ स्थानकांपैकी १७ स्थानकांवर कार्यरत असणाऱ्या महिला स्टेशन मास्तरांना व्यक्तिगत सन्मानपत्र, शाल आणि पुस्तक देऊन सन्मानित केले जाईल. या सन्मानासाठी ३१ मे २०२६ अखेर कार्यरत असणे हा एकमेव निकष लावण्यात आला असून, यामध्ये रत्नागिरी जिल्ह्यातील ७ आणि सिंधुदुर्ग जिल्ह्यातील १० महिला स्टेशन मास्तरांचा समावेश आहे. कोकण रेल्वेच्या सेवा नियमांचे काटेकोर पालन करून या गौरवमूर्तींना कोणत्याही स्वरूपाचा आर्थिक लाभ दिला जाणार नाही. या संपूर्ण उपक्रमासाठी कोकण रेल्वेचे रत्नागिरीचे क्षेत्रीय प्रबंधक शैलेश बापट आणि जनसंपर्क अधिकारी सचिन देसाई यांनी विशेष सहकार्य केले आहे.
पुरस्कारप्राप्त १७ महिला स्टेशन मास्तरांचा व्यक्तिगत सेवाकालावधी ४ वर्षांपासून ते ३० वर्षांपर्यंतचा प्रदीर्घ व व्यापक आहे. यामध्ये मडूरे स्टेशनच्या सौ. प्रतीक्षा लक्ष्मण गावकर या सर्वात सेवाज्येष्ठ आहेत, तर रत्नागिरी स्टेशनच्या कु. चैताली राजेंद्र कल्याणकर या सर्वात तरुण स्टेशन मास्तर आहेत. विशेष म्हणजे, यातील १५ महिला स्टेशन मास्तर मुळच्या कोकणातीलच रहिवासी आहेत. सावंतवाडी स्थानकावर कार्यरत असलेल्या सौ. अनुराधा रितेश पवार या जून २०२६ मध्ये २२ वर्षांच्या सेवेनंतर निवृत्त झाल्या आहेत. या सर्व महिलांच्या पार्श्वभूमीचा विचार केल्यास, एकूण ९ महिला स्टेशन मास्तर या प्रकल्पासाठी जमीन गेलेल्या प्रकल्पग्रस्त गटातील आहेत, २ जणी अनुकंपा तत्त्वावर लागून पदोन्नती झालेल्या आहेत, तर उर्वरित ६ महिला थेट स्पर्धा परीक्षा उत्तीर्ण होऊन सेवेत रुजू झाल्या आहेत. यातील ३ जणींचे पतीसुद्धा कोकण रेल्वेत कार्यरत आहेत. विशेष उल्लेखनीय बाब म्हणजे, रत्नागिरी स्टेशनच्या सौ. अनघा राजाराम नाटेकर यांनी १९९५ मध्ये याच रत्नागिरी रेल्वे स्थानकाच्या उभारणीसाठी रोजंदारीवर काम केले होते आणि आज त्या तिथेच स्टेशन मास्तर म्हणून सेवा बजावत आहेत.
या गौरवमूर्ती महिला स्टेशन मास्तरांनी यापूर्वीही आपल्या उत्कृष्ट कामगिरीचा ठसा उमटवला आहे. या पैकी ५ जणींना विविध वर्षांत कोकण रेल्वेच्या अध्यक्ष तथा व्यवस्थापकीय संचालकांच्या (CMD) पुरस्काराने सन्मानित करण्यात आले आहे. २ जणींना रेल्वे सुरक्षा आयुक्तांचे १००० रुपयांचे विशेष रोख पारितोषिक, तर २ जणींना रत्नागिरी क्षेत्रीय प्रबंधकांचे विशेष प्रमाणपत्र आणि १००० रुपयांचे बक्षीस मिळाले आहे. कु. चैताली राजेंद्र कल्याणकर यांनी आपल्या कार्यमूल्यमापनात प्रथम क्रमांक पटकावल्यामुळे त्यांना ‘केआरए’ (KRA) पुरस्कार मिळाला आहे, तर सौ. मनिषा हरिश्चंद्र तटकरी यांनी दोन वेगवेगळ्या वर्षांत, दोन वेगवेगळ्या स्थानकांवर दोन वेगवेगळे पुरस्कार मिळवण्याचा बहुमान मिळवला आहे.
या सन्मानास पात्र ठरलेल्या १७ महिला स्टेशन मास्तरांमध्ये सौ. मनिषा हरिश्चंद्र तटकरी (कळंबणी बुद्रुक), कु. अस्मिता तुकाराम सावंत (खेड), सौ. श्रद्धा समिर चिले (खेड), शिल्पा शंकर दपके (चिपळूण), श्रीमती निकिता निलेश पवार (कडवाई), सौ. अनघा राजाराम नाटेकर (रत्नागिरी), कु. चैताली राजेंद्र कल्याणकर (रत्नागिरी), कु. प्राजक्ता प्रदीप कांबळे (खारेपाटण), कु. अंजली श्रीराम चाळके (नांदगाव), सौ. मनस्वी सुभाष कदम (नांदगाव), श्रीमती विशालम दिनेश बेटकर (कणकवली), सौ. रंजना दीपक माने (कणकवली), सौ. सुविधा इमानवेल स्वामी (सिंधुदुर्ग), सौ. मेघा कमलाकर नागवेकर (सिंधुदुर्ग), सौ. प्रज्ञा भालचंद्र नाईक (झाराप), सौ. अनुराधा रितेश पवार (सावंतवाडी) आणि सौ. प्रतीक्षा लक्ष्मण गावकर (मडूरे) यांचा समावेश आहे. जुलै महिन्याच्या पहिल्या १० दिवसांत एकूण १२ महिला स्टेशन मास्तरांचा सन्मान थेट त्यांच्या सेवेच्या ठिकाणी (रेल्वे स्थानकांवर) जाऊन केला जाणार आहे, तर उर्वरित ५ महिला स्टेशन मास्तरांचे सन्मान साहित्य त्यांच्या पत्त्यावर स्पीड पोस्टाने पाठविले जाईल, अशी माहिती बोडस चॅरिटेबल ट्रस्टच्या खजिनदार ॲडव्होकेट सौ. आदिती अभिजित पटवर्धन यांनी दिली आहे.
