कोल्हापूर-मुंबई प्रवासासाठी ठरणार नवा पर्याय; आमदार दीपक केसरकर यांच्या संकल्पनेतून साकारला प्रकल्प
सावंतवाडी, दि.२२: सह्याद्रीच्या कुशीत वसलेल्या दुर्गम भागाला विकासाच्या मुख्य प्रवाहात आणण्यासाठी अत्यंत महत्त्वाच्या मानल्या जाणाऱ्या धवडकी-सांगेली-कलंबिस्त-शिरशिंगे-शिवापूर या मुख्य राज्यमार्ग १९० च्या रुंदीकरणाच्या कामाला वेग आला आहे. आमदार दीपक केसरकर यांच्या संकल्पनेतून या संपूर्ण मार्गाचे नियोजन करण्यात आले असून, त्यापैकी धवडकी ते सांगेली या पहिल्या टप्प्याचे रुंदीकरण सुमारे २ कोटी ७० लाख रुपये निधीतून दर्जेदार पद्धतीने पूर्ण झाले आहे. या पहिल्या टप्प्यातील कामाचे नुकतेच शानदार लोकार्पण करण्यात आले.
शिवसेनेचे जिल्हाप्रमुख संजू परब यांच्या हस्ते श्रीफळ वाढवून आणि फित कापून या मार्गाचे उद्घाटन करण्यात आले. यावेळी बोलताना संजू परब म्हणाले की, हा राज्यमार्ग निश्चितच या भागाच्या विकासाला नवी दिशा देणारा ठरेल. सह्याद्री पट्ट्यातील गावे विकासाच्या वाटेवर आणण्यासाठी आमदार केसरकर यांनी हे रुंदीकरणाचे काम हाती घेतले होते. धवडकी ते सांगेली हा पहिला टप्पा पूर्ण झाल्यामुळे आता दुर्गम भागातील नागरिकांना सावंतवाडी शहरात अवघ्या अर्ध्या तासात पोहोचणे शक्य होणार आहे. लवकरच सांगेली ते शिरशिंगे-कलंबिस्त या पुढील टप्प्यातील रुंदीकरणाचे कामही प्राधान्याने हाती घेतले जाईल, अशी ग्वाही त्यांनी यावेळी दिली.
या कार्यक्रमाला शिवसेनेचे माजी जिल्हाप्रमुख अशोक दळवी, उपतालुकाप्रमुख जीवन लाड, वामन नार्वेकर, सामाजिक कार्यकर्ते गणपत राणे, उपसरपंच सुरेश पास्ते, संतोष नार्वेकर, दीपक सांगेलकर, अभय किनळोस्कर, उपविभाग प्रमुख संजय पालकर, ओबीसी तालुकाप्रमुख वासुदेव होडावडेकर, अंकुश परब, अमित चव्हाण, प्रकाश सावंत यांच्यासह मान्यवर उपस्थित होते.
यावेळी उपतालुकाप्रमुख जीवन लाड यांनी विशेषतः नमूद केले की, पाडगाव मार्गे कोल्हापूरला जोडणारा शिरशिंगे-शिवापूर असा मार्ग विकसित करण्यासाठी विशेष समिती गठित केली जाईल, जेणेकरून या भागाच्या प्रवासाचा आणि दळणवळणाचा प्रश्न कायमचा सुटेल.
कार्यक्रमाचे औचित्य साधून रस्ते कामासाठी सहकार्य करणारे जमीन मालक रमेश नाईक व वामन नार्वेकर यांचा शाल व श्रीफळ देऊन संजू परब यांच्या हस्ते सत्कार करण्यात आला. तसेच जिल्हाप्रमुख संजू परब यांचा सत्कार उपतालुकाप्रमुख जीवन लाड यांनी केला. याप्रसंगी मुख्याध्यापक रामचंद्र घावरे, चंद्रकांत राणे, चेतन सावंत, ग्रामपंचायत सदस्य हनुमंत पास्ते, सचिन नार्वेकर व ग्रामस्थ मोठ्या संख्येने उपस्थित होते.
