ऐतिहासिक शस्त्रास्त्रांच्या प्रदर्शनास विद्यार्थ्यांचा मोठा प्रतिसाद
सावंतवाडी,दि.२०: सिंधुदुर्ग सैनिक स्कूल आंबोलीच्या वतीने आयोजित करण्यात आलेल्या ‘साहसी व व्यक्तिमत्व विकास शिबिरा’दरम्यान विद्यार्थ्यांसाठी शिवकालीन इतिहासाची प्रचिती देणारा विशेष उपक्रम राबवण्यात आला. सोमवार, २० एप्रिल २०२६ रोजी दुपारी ३ वाजता दुर्ग रक्षक प्रतिष्ठान रेडी, दुर्ग मावळा प्रतिष्ठान आणि नैसर्गिक पर्यावरण संवर्धन व मानवता विकास संस्था (भारत) यांच्या संयुक्त विद्यमाने ‘इतिहासाची साधने व प्रदर्शन’ हा कार्यक्रम उत्साहात पार पडला.
सध्या सैनिक स्कूलमध्ये हे साहसी शिबिर दोन टप्प्यांत आयोजित करण्यात आले आहे. पहिला टप्पा १८ एप्रिल ते २४ एप्रिल २०२६ आणि दुसरा टप्पा २५ एप्रिल ते १ मे २०२६ या कालावधीत संपन्न होत आहे. या शिबिराचे औचित्य साधून आयोजित करण्यात आलेल्या इतिहासविषयक कार्यक्रमात इतिहास अभ्यासक ज्ञानेश्वर राणे यांनी विद्यार्थ्यांना मार्गदर्शन केले. त्यांनी शिवकालीन इतिहास आणि महाराष्ट्राच्या वैभवशाली गड-कोट किल्ल्यांच्या संवर्धनाचे महत्त्व विषद केले. विशेष म्हणजे, ‘अफजलखान वध’ हा ऐतिहासिक प्रसंग श्री. राणे यांनी विद्यार्थ्यांकडून प्रत्यक्ष शस्त्रे देऊन करून घेतला, ज्यामुळे इतिहासाचा हा अध्याय मुलांच्या डोळ्यासमोर जिवंत झाला.
या कार्यक्रमांतर्गत भरवण्यात आलेल्या प्रदर्शनात इतिहासाची भौतिक व लिखित साधने, तसेच आरमारी जहाजांची दुर्मिळ छायाचित्रे प्रदर्शित करण्यात आली होती. यामध्ये प्रामुख्याने मराठा धोप, मराठा गुर्ज, वाघनखे, कट्यार, दांडपट्टा, खंडा तलवार, ढाल आणि जिरेटोप यांसारख्या ऐतिहासिक शस्त्रास्त्रांचा समावेश होता. ही शस्त्रे जवळून पाहता आल्याने शिबिरार्थींमध्ये मोठे कुतूहल आणि उत्साह पाहायला मिळाला.
याप्रसंगी दुर्ग रक्षक प्रतिष्ठानचे सदस्य राजाराम (आबा) चिपकर, एज्युकेशन इन्स्ट्रक्टर सुभेदार शिवराज पवार, ऑनरी कॅप्टन जयराम कोळी, ज्येष्ठ शिक्षक एस. के. गावडे, कॅम्प कमांडर दत्ता वावधने, शिक्षक परमेश्वर सावळे, हंबीरराव अडकुरकर, एस. एन. पोद्दार, आर. पी. माने, संतोष राऊळ, उदय घारे आणि कोच सतीश अहिर उपस्थित होते. तसेच ‘डी कर्नल अकॅडमी फॉर एडवेंचर अँड एरोस्पोर्टस’चे प्रशिक्षणार्थी, सैनिक स्कूलचे विद्यार्थी, शिक्षक व शिक्षकेतर कर्मचारी मोठ्या संख्येने उपस्थित होते. सैनिक स्कूलचे प्राचार्य एन. डी. गावडे यांनी या उपक्रमाचे कौतुक करत आयोजक संस्थांना शुभेच्छा दिल्या. आभार प्रदर्शनाने या प्रेरणादायी कार्यक्रमाची सांगता करण्यात आली.
