पनवेलमध्ये शिवव्याख्याते प्रा. रुपेश पाटील यांचे ‘धगधगते’ व्याख्यान संपन्न
पनवेल,दि.२२: “अलीकडे छत्रपती शिवराय आणि छावा शंभूराजे यांना आपली युवाई फॉलो करत आहे, याचा सार्थ अभिमान वाटतो. मात्र, स्वराज्याचे हे दोन्ही छत्रपती केवळ डोक्यावर घेऊन नाचणे महत्त्वाचे नसून, त्यांचे विचार आपल्या डोक्यात घालणे ही काळाची गरज आहे. छत्रपती शिवरायांची युक्ती आणि महापराक्रमी शंभूराजांचे शौर्य अंगी बाळगले, तर कोणतेही क्षेत्र गाजवता येते आणि यश हमखास मिळवता येते,” असे परखड मत सुप्रसिद्ध शिवव्याख्याते प्रा. रुपेश पाटील यांनी व्यक्त केले. पनवेल येथे आयोजित शिवजयंती उत्सवात ‘शिवराय डोक्यावर नव्हे, डोक्यात घालायला शिका!’ या विषयावर ते बोलत होते.
केदार सहकारी गृहनिर्माण संस्था (मर्यादित) व केदार सोसायटी सोशल असोसिएशन यांच्या संयुक्त विद्यमानाने शिवजयंती उत्सव मोठ्या उत्साहात साजरा करण्यात आला. या निमित्ताने आयोजित धगधगत्या व्याख्यानात प्रा. पाटील यांनी शिवरायांच्या जीवनकार्यातील विविध पैलूंवर प्रकाश टाकला. ते पुढे म्हणाले की, शिवरायांनी संपूर्ण आयुष्यात अंधश्रद्धेला कधीही स्थान दिले नाही. त्यांच्या बहुतांश युद्धमोहिमा या अमावस्येच्या दिवशीच यशस्वी झाल्याचे दिसून येते, यावरून त्यांचा वैज्ञानिक दृष्टिकोन स्पष्ट होतो. शिवरायांनी रयतेचे स्वराज्य घडवले, म्हणूनच त्यांना ‘जाणता राजा’ ही उपाधी सार्थ ठरते. स्वराज्याच्या काळात एकाही शेतकऱ्याने आत्महत्या केली नाही, ही बाब महाराजांची दूरदृष्टी आणि शेतीविषयक धोरण अधोरेखित करते.
व्याख्यानादरम्यान प्रा. पाटील यांनी आपल्या ओघवत्या शैलीत अफजलखानाचा वध, घोडखिंडीतील बाजीप्रभू देशपांडे यांचा अतुलनीय पराक्रम आणि शिवा काशिद यांची असीम स्वामीनिष्ठा असे ऐतिहासिक प्रसंग जिवंत केले. “अफजलखानासारख्या बलाढ्य शत्रूचा वध कसा केला, हे जर आपण नीट समजून घेतले तर शिवरायांचे सूक्ष्म व्यवस्थापन लक्षात येते,” असेही त्यांनी यावेळी आवर्जून नमूद केले.
शिवजयंती निमित्त केदार सोसायटीमध्ये दिवसभर विविध भरगच्च कार्यक्रमांचे आयोजन करण्यात आले होते. सकाळी शिवज्योत आगमन सोहळा आणि रक्तदान शिबिर संपन्न झाले, तर सायंकाळी भव्य मिरवणूक काढण्यात आली. रात्रीच्या सत्रात सांस्कृतिक कार्यक्रमांनी रंगत वाढवली. या संपूर्ण सोहळ्यात सोसायटीमधील माता-भगिनी, चिमुकले शिवप्रेमी आणि तरुण वर्ग मोठ्या संख्येने सहभागी झाला होता. कार्यक्रमाच्या यशस्वीतेसाठी केदार सोसायटी व सोशल असोसिएशनचे सर्व पदाधिकारी आणि शिवप्रेमी बांधवांनी विशेष परिश्रम घेतले.
