सावंतवाडी,दि.१७: किल्ले मनोहर मनसंतोष गडाच्या पायथ्याशी वसलेल्या शिरशिंगे येथील ऐतिहासिक गोठवेवाडी मध्ये दरवर्षीप्रमाणे यंदाही छत्रपती शिवाजी महाराज यांची जयंती मोठ्या उत्साहात साजरी करण्यात येणार आहे. श्री देव गोठेश्वर ग्रामविकास मंडळ आणि शिवतेज मित्र मंडळ, गोठवेवाडी यांच्या संयुक्त विद्यमाने १९ फेब्रुवारी २०२६ रोजी या भव्य ‘शिवजन्मोत्सव सोहळा’ कार्यक्रमाचे आयोजन करण्यात आले असून या उत्सवाचे हे १० वे वर्ष आहे.
या सोहळ्याची सुरुवात सकाळी ७:३० वाजता किल्ले मनोहर मनसंतोष गडावरून शिवज्योतीचे आगमन करून केली जाणार आहे. त्यानंतर सकाळी ९:०० वाजता शिवप्रतिमा व शिवज्योतीचे विधीवत पूजन पार पडेल. सकाळी १०:०० वाजता अल्पोपहार झाल्यानंतर १०:३० ते दुपारी १:०० या वेळेत विविध सांस्कृतिक कार्यक्रमांचे सादरीकरण होणार आहे. दुपारी १:०० ते ३:०० या वेळेत सर्व उपस्थितांसाठी स्नेहभोजनाची व्यवस्था करण्यात आली असून, दुपारी ३:०० वाजता महिलांसाठी जिजाऊ बचत गटाच्या वतीने हळदी-कुंकू समारंभाचे विशेष आयोजन करण्यात आले आहे.
सोहळ्याच्या उत्तरार्धात सायंकाळी ७:०० वाजता संपूर्ण परिसरात दीपोत्सव साजरा केला जाईल आणि सायंकाळी ७:३० वाजता सामूहिक राज्यगीत गायनाने या सोहळ्याचा समारोप होईल. प्रत्यक्ष शिवप्रभूंच्या पदस्पर्शाने पुनीत झालेल्या या भूमीत होणाऱ्या या उत्सवासाठी सर्व शिवप्रेमींनी मोठ्या संख्येने उपस्थित राहावे, असे आवाहन येथील ग्रामस्थ व आयोजकांनी केले आहे.
