राष्ट्रीय अध्यक्ष डॉ. रामदास आठवले यांची प्रमुख उपस्थिती; सिंधुदुर्गातील कार्यकर्त्यांना उपस्थित राहण्याचे आवाहन
सावंतवाडी,दि. ३०: रिपब्लिकन पार्टी ऑफ इंडिया (RPI) चा ६८ वा वर्धापन दिन सोहळा येत्या ३ नोव्हेंबर रोजी कोकणातील महाड क्रांती भूमी, चांदे मैदान येथे मोठ्या उत्साहात आयोजित करण्यात आला आहे. पक्षाचे राष्ट्रीय अध्यक्ष आणि केंद्रीय सामाजिक न्याय राज्यमंत्री नाम. डॉ. रामदासजी आठवले साहेब आणि महिला राष्ट्रीय नेत्या सिमाताई आठवले यांच्या प्रमुख मार्गदर्शनाखाली हा भव्य सोहळा संपन्न होणार आहे.
या वर्धापन दिन सोहळ्याला माजी केंद्रीय मंत्री खासदार नारायण राणे आणि मत्स्य व बंदर विकास मंत्री नाम. नितेश राणे यांची विशेष उपस्थिती असणार आहे. त्यांच्यासह राज्यातील अनेक मान्यवर मंत्री या कार्यक्रमाला हजेरी लावणार असल्याची माहिती जिल्हाध्यक्ष अजित कदम यांनी दिली.
यापूर्वी हा सोहळा ३ ऑक्टोबर रोजी नियोजित होता, मात्र राज्यातील पूर परिस्थितीमुळे तारीख बदलून तो आता ३ नोव्हेंबर रोजी आयोजित करण्यात आला आहे.
या प्रसिद्धी पत्रकात रिपब्लिकन पक्षाने आगामी स्थानिक स्वराज्य संस्थांच्या निवडणुकीसंदर्भात महायुतीकडे महत्त्वाच्या मागण्या केल्या आहेत.
डॉ. रामदास आठवले यांच्या मार्गदर्शनाखाली सिंधुदुर्ग जिल्ह्यात पक्ष मजबूत करण्याचे प्रयत्न सुरू आहेत, तसेच युवक आणि महिला आघाड्या सक्रियपणे कार्यरत आहेत.
रिपब्लिकन पक्ष हा महायुतीतील एक महत्त्वाचा घटक पक्ष असल्याने आणि लोकसभा व विधानसभेत पक्षाने महत्त्वाची कामगिरी बजावल्याने, आगामी जिल्हा परिषद, पंचायत समिती, नगरपालिका आणि नगर पंचायत निवडणुकांमध्ये महायुतीने पक्षासाठी १० टक्के जागा सोडाव्यात, अशी मागणी RPI ने केली आहे.
दरम्यान, या मागणीसंदर्भात पक्षाचे जिल्हाध्यक्ष अजित कदम यांनी लवकरच जिल्ह्याचे पालकमंत्री आणि महायुतीतील सर्व घटक पक्षांच्या जिल्हाध्यक्षांसोबत बैठक घेणार असल्याचे स्पष्ट केले आहे.
महाराष्ट्र प्रदेश सहसचिव रमाकांत जाधव, जिल्हाध्यक्ष अजित कदम, सरचिटणीस प्रकाश कांबळे, कार्याध्यक्ष सखाराम कदम, आणि संघटक एस.के. चेंदवणकर यांनी सिंधुदुर्ग जिल्ह्यातील रिपब्लिकन पक्षाच्या कार्यकर्त्यांना या महत्त्वपूर्ण सोहळ्याला मोठ्या संख्येने उपस्थित राहण्याचे आवाहन केले आहे.
