बांदा मराठा समाजाच्या वतीने गुणवंतांचा गौरव सोहळा उत्साहात; नवनियुक्त महिला कार्यकारिणी व ज्येष्ठ नागरिक मंचाच्या विजेत्यांचाही सन्मान
सावंतवाडी,दि.१३: “मराठा हे केवळ एक नाव नसून ते एक व्रत आहे. छत्रपती शिवाजी महाराजांचा वसा आणि वारसा जपत समाजाने प्रगतीची नवी शिखरे पादाक्रांत केली पाहिजेत. नव्या पिढीने समाजातील गुणवंतांचा आदर्श डोळ्यांसमोर ठेवून स्पर्धा परीक्षांकडे वळावे आणि प्रशासकीय सेवेत आपला ठसा उमटवावा. समाजातून गुणवत्तापूर्ण अधिकारी घडवण्यासाठी सामूहिक प्रयत्नांची नितांत गरज आहे,” असे प्रतिपादन प्रा. रुपेश पाटील यांनी केले. बांदा मराठा समाजाच्या वतीने नट वाचनालयाच्या नाडकर्णी सभागृहात आयोजित करण्यात आलेल्या विविध क्षेत्रांतील गुणवंतांच्या गौरव सोहळ्यात ते प्रमुख मार्गदर्शक म्हणून बोलत होते.
दहावी आणि बारावीनंतर विद्यार्थ्यांना नेमक्या करिअरच्या वाटा समजण्यासाठी योग्य वेळी मार्गदर्शन मिळणे आवश्यक असते, असे नमूद करत प्रा. पाटील यांनी समाजाच्या वतीने महिन्यातून किमान एकदा करिअर मार्गदर्शन उपक्रम राबवण्याचे आवाहन केले. केवळ शैक्षणिक पदव्या मिळवण्यापेक्षा समाजाच्या विकासात मोलाचे योगदान देणारे सक्षम अधिकारी घडवण्याचे ध्येय ठेवून नियोजनबद्ध प्रयत्न करावेत, अशी अपेक्षाही त्यांनी व्यक्त केली. दीपप्रज्वलन आणि छत्रपती शिवाजी महाराज यांच्या प्रतिमेस पुष्पहार अर्पण करून या सोहळ्याची दिमाखदार सुरुवात झाली.
या सोहळ्यात विविध क्षेत्रांत उल्लेखनीय कामगिरी करणाऱ्या सहा गुणवंतांचा मान्यवरांच्या हस्ते यथोचित सन्मान करण्यात आला. यामध्ये एम.एस्सी. रसायनशास्त्र परीक्षेत यश संपादन करणारी अंजली गोविंद सावंत, डॉक्टर पदवी प्राप्त केलेली अर्पिता अविनाश पंडित, लोकमान्य मल्टिपर्पजचा ‘बेस्ट मॅनेजर’ पुरस्कार विजेते तुळशीदास गवस, पोलीस उपनिरीक्षक सौ. श्रद्धा भानुदास दळवी, सौ. दीक्षा दिनेश नाईक आणि विशेष यश संपादन करणारा नैतिक नीलेश मोरजकर यांचा समावेश होता. गुणवंतांच्या सन्मानासोबतच बांदा मराठा समाजाच्या नवनियुक्त महिला कार्यकारिणीचा आणि ज्येष्ठ नागरिक विकास मंचाच्या निवडणुकीत विजयी झालेल्या सहा सदस्यांचा जाहीर सत्कार करून त्यांना पुढील वाटचालीस शुभेच्छा देण्यात आल्या.
कार्यक्रमाचे स्वागत अध्यक्ष परिमल सावंत आणि उपाध्यक्ष विनोद सावळ यांनी केले, तर सचिव सीताराम गावडे यांनी प्रास्ताविक केले. यावेळी गुगल कंपनीत उच्च पदावर कार्यरत असलेले प्रसाद शेटकर, समाजाचे माजी अध्यक्ष राजाराम उर्फ बाळू सावंत, उपसरपंच रत्नाकर आगलावे, माजी सभापती शीतल राऊळ, तंटामुक्ती समितीचे अध्यक्ष ज्ञानेश्वर सावंत, महिला अध्यक्ष सौ. लक्ष्मी सावंत आदी मान्यवर उपस्थित होते. बाळू सावंत, प्रसाद शेटकर आणि परिमल सावंत यांनी आपल्या मनोगतातून गुणवंतांचे कौतुक केले. कार्यक्रमाचे सूत्रसंचालन राकेश परब यांनी केले, तर भूषण सावंत यांनी आभार मानले. समाजातील गुणवंतांच्या कर्तृत्वाचा जागर आणि नव्या पिढीच्या स्वप्नांना नवी दिशा देणारा हा सोहळा समाजबांधव व भगिनींच्या मोठ्या उपस्थितीत उत्साहपूर्ण वातावरणात पार पडला.
