नवसफेडीसाठी कोकण,गोवा, मुंबईतून हजारो भाविक दाखल होणार; मंदिर परिसरात जय्यत तयारी
सावंतवाडी,दि.०६: दक्षिण कोकणातील लाखो भाविकांचे आराध्य दैवत आणि ‘प्रतिपंढरपूर’ म्हणून ख्याती असलेल्या सोनुर्ली नगरीत श्री देवी माऊलीचा वार्षिक अलौकिक लोटांगण जत्रोत्सव बुधवार, २५ नोव्हेंबर रोजी मोठ्या उत्साहात आणि भक्तिमय वातावरणात संपन्न होणार आहे. या सोहळ्याच्या पार्श्वभूमीवर सोनुर्ली देवस्थान परिसरात जय्यत तयारी सुरू झाली असून संपूर्ण परिसर माऊलीच्या जयघोषाने दुमदुमला आहे.
शेकडो वर्षांची प्रदीर्घ परंपरा लाभलेला हा जत्रोत्सव दक्षिण कोकणातील एक अत्यंत वैशिष्ट्यपूर्ण आणि अलौकिक धार्मिक उत्सव मानला जातो. या महोत्सवाचे मुख्य आकर्षण म्हणजे मनोकामना पूर्ण झाल्यानंतर भाविकांनी मंदिराभोवती घातले जाणारे लोटांगण होय. एकाच वेळी मंदिर प्रांगणात हजारो भाविक लोटांगण घालून नवस फेडतानाचे दृश्य डोळ्यांचे पारणे फेडणारे आणि भक्तीचा अपूर्व सोहळा अनुभवून देणारे ठरते. या अनोख्या सोहळ्याचे साक्षीदार होण्यासाठी तसेच देवीच्या चरणी नतमस्तक होण्यासाठी सिंधुदुर्गासह गोवा, मुंबई आणि महाराष्ट्राच्या कानाकोपऱ्यातून हजारो भाविक सोनुर्लीमध्ये दाखल होतात.
जत्रोत्सवाच्या दिवशी पहाटेपासूनच देवीच्या महापूजेला आणि धार्मिक विधींना सुरुवात होणार असून माऊलीची पारंपरिक अलंकारांनी मनमोहक पूजा बांधण्यात येणार आहे. भाविकांचा वाढता ओघ लक्षात घेऊन रांगांचे नियोजन, वाहतूक व्यवस्था, पिण्याचे पाणी आणि चोख सुरक्षा व्यवस्थेसाठी देवस्थान समिती व स्थानिक प्रशासन सज्ज झाले आहे. बाहेरगावाहून येणाऱ्या भाविकांना सुलभ दर्शन घेता यावे यासाठी आवश्यक सर्व उपाययोजना पूर्ण करण्यात आल्या असून, या पवित्र आणि अलौकिक जत्रोत्सवाचा लाभ भाविकांनी मोठ्या संख्येने घ्यावा, असे आवाहन देवस्थान कमिटीच्या वतीने करण्यात आले आहे.
