कालबादेवी परिसरात सापडलेली मौल्यवान पिशवी मूळ मालकाकडे सुपूर्द; पोलीस शिपाई अनिल पाटील यांच्यावर कौतुकाचा वर्षाव
मुंबई, दि.२८: कर्तव्यावर असताना प्रामाणिकपणाची मशाल हाती घेऊन समाजापुढे आदर्श निर्माण करणाऱ्या एका पोलीस कर्मचाऱ्याची सध्या मुंबईत सर्वत्र प्रशंसा होत आहे. रस्त्यावर सापडलेल्या मौल्यवान सोन्याच्या दागिन्यांसह रोख रक्कमेचा कोणताही मोह न बाळगता, ती संबंधितांपर्यंत पोहोचवून पायधुनी पोलीस ठाण्यातील पोलीस शिपाई अनिल सुदाम पाटील यांनी कर्तव्यनिष्ठेचा नवा वस्तुपाठ घालून दिला आहे.
पायधुनी पोलीस ठाण्यात कार्यरत असलेले पोलीस शिपाई क्रमांक ०९२५१७ अनिल सुदाम पाटील यांना कालबादेवी रोडवरील एका कपड्याच्या दुकानासमोर रस्त्याच्या कडेला एक बेवारस पिशवी पडलेली आढळली. त्यांनी ही पिशवी उघडून पाहिली असता, त्यामध्ये अंदाजे ५० ग्रॅम वजनाचे सोन्याचे दागिने आणि दोन हजार रुपयांची रोख रक्कम असल्याचे निदर्शनास आले. एवढ्या मोठ्या प्रमाणावर मौल्यवान ऐवज हाती लागल्यानंतरही जराही विचलित न होता पाटील यांनी तत्काळ प्रामाणिकपणाला प्राधान्य दिले. त्यांनी हा सर्व मुद्देमाल तत्काळ एल. टी. मार्ग पोलीस ठाण्यात नेऊन तेथील ड्युटी ऑफिसर पीएसआय जगताप यांच्या स्वाधीन केला. त्यानंतर पोलिसांनी तातडीने तपासचक्रे फिरवून मूळ मालकाचा शोध घेत हा मौल्यवान ऐवज त्याच्या हवाली केला. हरवलेली संपत्ती सुखरूप परत मिळाल्याने संबंधित नागरिकाने पोलिसांचे मनापासून आभार मानले.
आजच्या काळात रस्त्यावर सापडलेल्या मौल्यवान वस्तूंचा मोह टाळून त्या मूळ मालकापर्यंत पोहोचवणे हीच खऱ्या प्रामाणिकपणाची कसोटी मानली जाते. पोलीस शिपाई अनिल पाटील यांनी आपल्या कृतीतून ही कसोटी यशस्वीरीत्या पार पाडली असून, खाकी वर्दीचा सन्मान आणखी उंचावला आहे. त्यांच्या या उल्लेखनीय आणि कर्तव्यदक्ष कामगिरीची दखल घेत पायधुनी विभागाच्या सहाय्यक पोलीस आयुक्तांनी त्यांचे विशेष कौतुक करून अभिनंदन केले. एका पोलीस कर्मचाऱ्याच्या या कृतीमुळे सर्वसामान्य जनतेच्या मनातील पोलीस दलाविषयीचा आदर, विश्वास आणि सुरक्षिततेची भावना अधिक दृढ झाली असून, त्यांच्या या कार्याचे सर्व स्तरांतून स्वागत होत आहे.
