रंबलर स्ट्रिप, दिशादर्शक फलक व स्वच्छतागृह दुरुस्तीची अमोल टेंबकर यांची प्रशासनाकडे निवेदनाद्वारे मागणी
सावंतवाडी,दि.०३: कोलगाव येथील औद्योगिक प्रशिक्षण संस्थेच्या (आयटीआय) आवाराजवळ अधिकृत बस थांबा असतानाही अनेक एसटी बसेस तेथे न थांबता पुढे निघून जात असल्याने विद्यार्थ्यांना दररोज दोन ते अडीच किलोमीटरची पायपीट करावी लागत आहे. विद्यार्थ्यांची होणारी ही मोठी गैरसोय लक्षात घेऊन या थांब्यावर सर्व एसटी बसेस थांबवण्यात याव्यात, अशी ठाम मागणी जिल्हा रोजगार मेळावा समितीचे सदस्य अमोल टेंबकर यांनी सावंतवाडी आगारप्रमुखांकडे निवेदनाद्वारे केली आहे.
कुडाळ, माणगाव तसेच परिसरातील विविध ग्रामीण भागांतून शेकडो विद्यार्थी शिक्षणासाठी दररोज कोलगाव आयटीआयमध्ये ये-जा करतात. अधिकृत थांबा असूनही चालक बसेस थांबवत नसल्याने विद्यार्थ्यांना वेळेवर पोहोचण्यासाठी धावपळ करावी लागते. शिक्षक आणि विद्यार्थ्यांनी ही समस्या अमोल टेंबकर यांच्या निदर्शनास आणून दिल्यानंतर त्यांनी तातडीने सावंतवाडी बस स्थानक प्रशासनाशी संपर्क साधून संबंधित चालकांना या थांब्यावर बस थांबवण्याचे कडक निर्देश देण्याची मागणी केली. त्याचबरोबर, जुन्या मुंबई-गोवा महामार्गावरील वाहनांची वेगमर्यादा आणि विद्यार्थ्यांची वर्दळ पाहता येथे अपघाताची दाट शक्यता असल्याने सार्वजनिक बांधकाम विभागाने आयटीआयसमोर तातडीने रंबलर स्ट्रिप बसवाव्यात आणि चालकांना सावध करणारे दिशादर्शक फलक लावावेत, अशी मागणीही त्यांनी केली आहे. याशिवाय संस्थेतील स्वच्छतागृहांची झालेली दुरवस्था दूर करून विद्यार्थ्यांच्या आरोग्याच्या दृष्टीने त्यांची तातडीने डागडुजी व नियमित स्वच्छता करण्यात यावी, असेही टेंबकर यांनी निवेदनात नमूद केले असून प्रशासनाने या सर्व मागण्यांवर विलंब न लावता तातडीने कार्यवाही करावी, अशी अपेक्षा व्यक्त करण्यात आली आहे.
