शैक्षणिक क्षेत्रातील भरीव योगदानाची दखल; श्री पंचम खेमराज महाविद्यालयातर्फे जंगी सत्कार
- सावंतवाडी, दि.३०: मुंबई विद्यापीठाचे अधिसभा (सिनेट) सदस्य तसेच सिंधुदुर्ग जिल्हा शिक्षण प्रसारक मंडळ व श्रमिक विद्यार्थी ज्ञान सेवा संस्थेचे कार्यकारी विश्वस्त युवराज लखमसावंत भोंसले यांची कोल्हापूर येथील नामांकित संजय घोडावत विद्यापीठाच्या गव्हर्निंग कौन्सिल सदस्यपदी निवड झाली आहे. त्यांच्या या निवडीमुळे शैक्षणिक वर्तुळातून त्यांचे जोरदार स्वागत होत असून, गेली अनेक वर्षे शैक्षणिक क्षेत्रात त्यांनी केलेल्या उल्लेखनीय कार्याची ही पोचपावती मानली जात आहे. या निवडीच्या पार्श्वभूमीवर श्री पंचम खेमराज महाविद्यालयाच्या वतीने त्यांचा विशेष सत्कार करण्यात आला.
युवराज लखमसावंत भोंसले यांनी मुंबई विद्यापीठाच्या सिनेट सदस्यपदाच्या माध्यमातून विद्यार्थ्यांच्या आणि शिक्षणाच्या हितासाठी सातत्याने प्रभावी काम केले आहे. सिंधुदुर्ग जिल्ह्यातील अग्रगण्य, पदवी ते पदव्युत्तर शिक्षण देणारे, मुंबई विद्यापीठाचे ‘बेस्ट कॉलेज’, ‘नॅक’ची ‘ए’ श्रेणी प्राप्त, जिल्ह्यातील पहिले स्वायत्त आणि लीड कॉलेजचा दर्जा लाभलेल्या श्री पंचम खेमराज महाविद्यालय, सावंतवाडीच्या जडणघडणीत त्यांचा सिंहाचा वाटा राहिला आहे. पारंपरिक कला, वाणिज्य आणि विज्ञान शाखांसोबतच आयटी, कॉम्प्युटर सायन्स, डेटा सायन्स आणि कृत्रिम बुद्धिमत्ता (एआय) यांसारखे आधुनिक तंत्रज्ञानाधारित अभ्यासक्रम राबवून बदलत्या राष्ट्रीय शैक्षणिक धोरणानुसार संस्था अद्ययावत ठेवण्यासाठी ते नेहमीच पुढाकार घेत आले आहेत.
या निवडीनिमित्त आयोजित सत्कार समारंभात सिंधुदुर्ग जिल्हा शिक्षण प्रसारक मंडळाचे अध्यक्ष राजेसाहेब श्रीमंत खेमसावंत भोंसले यांनी युवराज लखमसावंत भोंसले यांना पुष्पगुच्छ प्रदान करून गौरविले. याप्रसंगी संस्थेच्या कार्याध्यक्षा राणीसाहेब सौ. शुभदादेवी भोंसले, नियामक मंडळाचे सदस्य जयप्रकाश सावंत, डॉ. सतीश सावंत, संचालक प्रा. डी. टी. देसाई, सहायक संचालक ॲड. शामराव सावंत, महाविद्यालयाचे प्राचार्य डॉ. डी. एल. भारमल, श्री पंचम खेमराज लॉ कॉलेजच्या प्राचार्या डॉ. अश्विनी लेले, मदर क्वीन्स इंग्लिश मीडियम स्कूलच्या मुख्याध्यापिका सौ. अनुजा साळगावकर यांच्यासह महाविद्यालयातील प्राध्यापक वर्ग, शिक्षकेतर कर्मचारी आणि संस्थेचे मान्यवर सदस्य मोठ्या संख्येने उपस्थित होते.
